سوپاس مامۆستا
سوپاس کە هەبوویت
سوپاس کە لەو شارانەی
تیایاندا غەریب بووین،
لەگەڵمان ڕادەوەستایت و
ئێمە وەک وردە ماسی بریندار و
هەناسە پێنەماو،
دەممان دادەچەقان و
تۆ لە هەوا و لە ڕەنگ و لە تەم و
لە هەتاوی خۆتت بەش دەداین..
سوپاس مامۆستا کە شەقامە تاریک و
پیسەکانت بۆ ڕەنگ دەکردین و
هانی هەڵکردنت تیایاندا دەداین
سوپاس کە هەر لەگەڵمان بوویت و
دەستبەردارمان نەبوویت
لە سەفەری نێوان وڵات و شارەکاندا
هاوسەفەرمان بوویت و
کە سەرمان هەڵدەگرت
بە باڵی تەیرەکانت دەهاتیت بۆ لامان،
بە بڕستی ماسییە ڕەنگاوڕەنگەکانت
خۆت دەگەیاندە کەناری نائارامیمان
سوپاس کە هەبوویت، مامۆستا
تۆ لە هەر کوێ بووبیت، ئەو جێگەیە
بووەتە شوێنی تۆ و
ئەو شوێنە تۆی بە زارۆکی
خۆی زانیوە
تۆ لە هەر شارێک بووبیت، ئەو شارە
بۆنی ئەڵوەن و ڕەنگی گۆرانی
خوداداد عەلی گرتووە،
بەڵام تۆ بە هەموو شارەکاندا وەک
ئەوەی شاری خۆت بن،
گەڕاویت و
هەموویانت بە شار و زێدی خۆت زانیوە
ئای مامۆستا چ خۆش بوو
کە لە شارە زۆر دوورەکاندا
دەمانبینیت و
بە كۆڵانی تابلۆکانتدا دەگەڕاین،
باڵندەکانت بە کوردی لێمان کۆ دەبوونەوە و
خەمین خەمین دڵی ئێشاوی
کوردبوونیان دەداینەوە و
لەگەڵماندا پێدەکەنین و دەگریان!
سوپاس مامۆستا کە شەش دەیە زیاترە لەگەڵماندای
لەکتێب و شیعر و تابلۆکاندا
لە گەڵماندای
لە شەڕ و لە نسکۆ و لە دڵشکانەکاندا
لە بازڕەبوون و تووڕەبوون و
نەفرەت لێکردنەکاندا
لە ئاشتبوونەوە و لێخۆشبوونەکاندا
لە بەرد و لە ئاو و لە دار و
لە ڕەش و لە سپی
لە خۆشی و ناخۆشییدا لەگەڵماندای
سوپاس مامۆستا کە هەبوویت
سوپاس کە لەمەولاش هەیت
سوپاس کە لەگەڵمان بوویت
سوپاس کە لەگەڵمانیت
سوپاس مامۆستا کە دەستبەردارمان
نابیت و
هەر لەگەڵمان دەبیت.
(دلاوەر قەرەداغی)
سەرچاوە: galawej
