ڕەزا بەگ ڕۆژێک لە دیوەخان لەگەڵ هەندێ کەسا دانیشتبوون خەبەریان هێنا وتیان «ئەحەی ناسر» خوا کوڕێکی داوەتێ، بەڵام نۆ مانگی تەواو نەکردووە لە دایک بووە. ڕەزا بەگ وتی: بەخوا منداڵێ کە بە حەو مانگی ببێ ئەوە نابەکامی پێ ئەڵێن و هیچی لێ پەیدا نابێ. پیاوێک لەولاوە وتی: قۆربان وا مەفەرموو، من بیستوومە ئەو جۆرە منداڵانە هەموو پاڵەوان و پیاوی گەورە ئەبن، تەنانەت ناپلیۆن و محەمەد فاتح، ئەڵێن هەردووکیان بە حەوت مانگی هاتوونەتە دونیاوە. ئیتر ڕەزا بەگ گورج وتی: سا بە خوا بە سەری ئەم مەجلیسە بە گۆڕی باوکم بیستوومە کە خۆم و باوکم هەردووکمان بە حەوت مانگی لە دایک بووین!
