دیمەنی فێستیڤاڵەکە.
پێنجەمین فێستیڤاڵی هەڵپەڕکێ لە بانە کۆتاییهات. لە نێو 13 گرووپی سەرکەوتوو بۆ بەشی کێبەرکێ، خەڵاتی تایبەتی لیژنەی دادوەران بە گرووپەکانی چیکسای خۆراسان، گۆڤەندی ورمێ، 12 سوارەی مەریوان و سیروانی ئیلام بەخشرا. چیای سەقز خەڵاتی باشترین چۆپی کێش و هەتاوی مهابادیش خەڵاتی باشترین گاوانی پێ بەخشرا.
لە فێستیڤاڵی ئەمساڵی هەڵپەڕکێدا، ژمارەیەک گرووپ و چالاکڤان بەشدار نەبوون. بەشدارینەکردنیشیان پەیوەندی بەو تێبینییانەوە هەیە، لەسەر بەڕێوەبردنی ئەو فێستیڤاڵانە هەیانە. ئەوان دەڵێن، لە دوای ناڕەزاییەکانی ساڵی رابردووەوە، دامودەزگا حکومی و ئەمنییەکان هەوڵدەدەن، بەو رێوڕەوسم و فێستیڤاڵانە، دۆخی کوردستان ئاسایی پێشان بدەن.
ئیجلال قەوامی، رۆژنامەڤان و چالاکڤانی مافی مرۆڤ لە سنە دەڵێت، ئامانج لە بەڕێوەبردنی ئەو فێستیڤاڵانە پێشاندانی وێنەیەکی دڵخۆش و هیوادارە لە کۆمەڵگەی کوردستان. دەشڵێت، بەو فێستیڤاڵانە دەیانهەوێت ئاستی داواکارییە ئابووری، کولتووری و کۆمەڵایەتییەکانی خەڵک دابەزێنن. ئەو چالاکڤانە دەپرسێت، ئەو هەمووە فێستیڤاڵە ورد و درشتە قازانجی بۆ هەندێک کەس هەبووە، بەڵام دەستکەوتی بۆ کوردستان چ بووە؟
بەڕێوەبەرانی فێستیڤاڵەکان دەڵێن، ئامانجیان گرنگیدان بە توانا هونەری، ئابووری و گەشتیارییەکانی کوردستانە، بەڵام ئەوەی بەرچاوە، هاونیشتمانییانیش وەکو ساڵانی رابردوو پێشوازی لە بەڕێوەبردنی ئەو فێستیڤاڵانە ناکەن.
رووداو دیجیتاڵ
