هاوڕێیانی هێژا
لەكاتێكدا جیهان خولەك بە خولەك و كاتژمێر بە كاتژمێر بە دڵۆپەژەمی ڕیپۆرتاژی هەواڵەكاندا هەڵواسراوە، یارمەتی هەیە هەموومان بانگهێشت بكەم، وەك داهێنەر، تا بە بواری كاركردن و ڕووبەر و تێروانینە ڕاستەقینەكانمانەوە بچینە ناو كاتی داستان، گۆڕانكاری داستان، بیركردنەوەی داستان، ڕەنگدانەوەی داستان و بۆچوونی داستان ئامێزەوە؟ ئێمە لەكاتێكی داستان ئامێزی مێژووی مرۆڤایەتیدا دەژین، وە ئەو گۆڕانكارییە قووڵ و بەرچاوانەی ئێمە ئەزموونیان دەكەین لەپەیوەندی مرۆڤەكاندا بەخودی خۆیانەوە و بەیەكترەوە و بە جیهانی نا مرۆییانەوە، لە سەروو دەستڕاگەییشتنی ئێمەوەیە بۆ باسكردن، یان بۆ قسەلەسەركردن و گوزارشت لێكردن.
ئێمە لەخولگەی "هەواڵەكان لە ٢٤ كاژێر دا" ناژین، بەڵكو لە كەناری كاتدا دەژین. ڕۆژنامەكان و مێدیا وەك پێویست كەرەستەئامێز نین و لە توانایاندا نییە ڕەفتار لەگەڵ ئەوەدا بكەن كە ئێمە ئەزموونیان دەكەین.
ئەو زمانە لەكوێیە، ئەو جووڵانە كامانەن، ئەو وێنانە چین بشێت یارمەتیمان بدەن بتوانێت لەم بزێوی و تێكشكانە قووڵانە تێبگەین كە ئەزموونیان دەكەین؟ وە چۆن بتوانین كرۆك و مانای ژیانمان هەر ئێستا بگۆڕین، وەك ئەزموون نەك ڕیپۆرتاژ؟
شانۆ فۆرمێكی هونەرییە بۆ ئەزموونكردن
لەناو جیهانێكدا كە لەسەر میدیای كۆمپانیا زەبەلاحەكان قوڵپدەدات، لەناو ئەزموونە هاوشێوەكان "هاوشێوەیی ئەزموونەكان" و پێشبینیكردنە تۆقێنەرەكاندا، ئێمە چۆن بتوانین ئەو دووبارەبوونەوە بێكۆتاییەی ژمارەكان تێپەڕێنین تا بتوانین پیرۆزیی و ناكۆتاییەكانی یەك ژیان، یەك سیستمی ژینگە، هاوڕێیەتی، یان بەهای ڕووناكییەك لە ئاسمانێكی نامۆدا ئەزموون بكەین؟ دوو ساڵ لە كۆڤید ١٩ هەستی خەڵكی كاڵكردەوە، ژیانی خەڵكی بەرتەسك كردەوە، پەیوەندییەكانی پچڕاند، ئێمەی گەیاندە خاڵی سفری نائاسایی نشینگەی مرۆڤەكان.
لەم ساڵانەدا پێویستە چ تۆوێك بنێژرێت یان دیسان بچێندرێتەوە؟ جۆری ئەو بخۆرە لە ڕاددەبەدەر گەورەكراوانە چین كە پێویستە بەتەواوی بنەبڕ بكرێن؟ خەڵكێكی زۆر لەكەناردان، بەشێوەیەكی ناهۆشیارانە و چاوەڕواننەكراو زۆر توندوتیژی هەڵگیرساون. زۆر سیستمی دامەزراو وەك بونیادێك بۆ توندوتیژییەكی بەردەوام ئاشكرابوون.
مەراسیمەكانی یادكردنەوەكانمان لەكوێن؟ دەمانەوێت یادی چی بكەینەوە؟ ئەو (یەزد)انە چین كە دواجار دەستئاوەڵامان دەكەن بتوانین جارێكیتر مەزەنە بكەینەوە و دەست بە پرۆڤەی ئەو هەنگاوانە بكەین كە پێشتر هەرگیز نەمانناون.
شانۆی تێڕوانین، مەبەست، ساڕێژبوون و گرنگیپێدانی داستانئامێز، پێویستی بە یەزدگەلی نوێ هەیە. ئێمە پێویستمان بەوە نییە بەزممان بۆ بگێڕدرێت. پێویستمان بەوەیە كۆببینەوە. پێویستمان بەوەیە هاوبەشیی لە ڕووبەردا بكەین. پێویستمان بەوەیە ڕووبەری هاوبەش بكێڵین، پێویستمان بە ڕووبەری پارێزگاریلێكراو هەیە بۆ گوێگرتنی قووڵ، بۆ یەكسانیی.
شانۆ داهێنانی ڕووبەرێكە لەسەر زەمین بۆ یەكسانیی نێوان مرۆڤەكان، خوداكان، ڕووەكەكان، ئاژەڵەكان، دڵۆپە بارانەكان، فرمێسكەكان و بۆ نۆژەنكردنەوە. ڕووبەری یەكسانیی و گوێگرتنی قووڵ، بە جوانییەكی شاردراوە دەدرەوشێتەوە. وە بەهۆی تێكەڵبوونێكی قووڵی مەترسی، هاوسەنگیی، ژیریی، كاركردن و دانبەخۆداگرتنەوە درێژە بە ژیان دەدات.
لە "سوترای ڕازاندنەوەی گوڵ" دا، بودا ١٠ جۆر دانبەخۆداگرتنی مەزن بۆ ژیانی مرۆڤ ڕیز دەكات. یەكێك لە بەهێزترینەكانی ناونراوە " دانبەخۆداگرتن لە درككردندا بەوەی هەموان تراویلكەن". شانۆ هەمیشە ژیانی ئەم جیهانەی وەك لێكچوویەكی تراویلكە نیشانداوە، بەمەش دەرفەتی بۆ دروستكردووین تا بە ئازادكردنی بەرچاوڕوونی و هێزەوە، لە ڕێی ئەندێشەكانی مرۆڤەوە، وەهم و كوێریی و نكووڵیی ببینین.
ئێمە زۆر لەوە دڵنیاین كە تەماشای چی دەكەین، وە چۆن تەماشای دەكەین، بە ڕاددەیەك دڵنیاین كە ئیتر توانای بینین و هەستكردن بە واقیعێكی ئەڵتەرناتیڤ و ئەگەری نوێ و ڕێچكەی جیاواز و پەیوەندیی نەبینراوو پێكگەیشتنی نەمرمان نییە.
ئێستا كاتی ئەوەیە مێشك، هەست ، مەزەنە مێژوو وە پاشەڕۆژمان بە قووڵی بژێنینەوە. ئەم كارە بەخەڵكی تەریككراو ئەمجام نادرێت كە بەتەنیا كار دەكەن. ئەمە ئەو كارەیە كە پێویستە ئێمە بەیەكەوە ئەنجامی بدەین.
شانۆ بانگهێشتكردنێكە تا ئەم كارە بەیەكەوە ڕاپەڕێنین.
لە دڵەوە سوپاس بۆ كاركردنتان
لە ئینگلیزییەوە/ ڕزگار حەمە ڕەشید
سەرچاوە: بنکەی ڕووناکبیری گەلاوێژ
