له‌چوارچێوه‌ی سه‌ردانێكدا بۆ شاری سلێمانی فۆتۆگرافه‌ری ئێرانی ”ئه‌حمه‌دی ناتقی” خاوه‌نی گرته‌ی كاره‌ساتباری ”عومه‌ری خاوه‌ر” چه‌ند دیدارو به‌سه‌ركردنه‌وه‌یه‌كی ئه‌نجامدا.
ئه‌حمه‌دی ناتقی كه به میوانداریی لقی سلێمانی سه‌ندیكای رۆژنامه‌نوسانی كوردستان و ده‌زگای میدیایی جام كوردی، بۆ ساڵیادی كاره‌ساتی كیمیابارانی هه‌ڵه‌بجه له شاری سلێمانییه و سه‌ردانی هه‌ڵه‌بجه‌ش ده‌كات، زنجیره‌یه‌ك كۆڕ و سیمینار و دیدار ئه‌نجام ده‌دات.
سه‌رله‌به‌یانی ئه‌مڕۆش 12-3-2022 له سه‌ره‌تای دیداره‌كانیدا سه‌ردانی رێكخراوی دیالۆگ و كلتوری كرد و له گفتۆگۆیه‌كی كراوه‌دا باسی كار و چالاكییه‌كانی رێكخراوه‌كه‌یان كرد و د. ئه‌حمه‌د ناتقی پێی راگه‌یاندن له‌مڕۆدا له‌ڕێگه‌ی وێنه‌وه له زووترین كاتدا ده‌توانن په‌یامی خۆیان بگه‌یه‌ننه جیهان.
دواتر و له‌كۆڕێكدا ساڵۆنی كوردستانی نوێ میوانداریی د.ئه‌حمه‌دی ناتقی كرد.
له سه‌ره‌تای كۆڕه‌كه‌دا دیكۆمێنتارییه‌ك له‌سه‌ر ژیان و به‌رهه‌مه‌كانی د.ناتقی پێشكه‌شكرا، كه له‌لایه‌ن سایتی PUKmedia ه‌وه ئاماده‌كرابوو.
دواتر له وته‌یه‌كدا د.ناتقی باسی له یه‌كه‌م ساته‌كان رۆژی 16-3-1988 كرد، كه دوای نزیكه‌ی نیوسه‌عات له كیمیابارانه‌كه چۆته سه‌ر ته‌رمی عومه‌ری خاوه‌رو كۆرپه‌كه‌ی و یه‌كه‌م گرته‌ی ئه‌و كاره‌ساته‌ی له رێی كامێری فیلمه‌وه تۆماركردووه‌و وتی : فۆتۆی عومه‌ری خاوه‌ر یه‌كێكه له‌و گرته خه‌مناكانه‌ی له كاری میدیایدا تۆماری كردووه.
له‌به‌شێكی تری كۆڕه‌كه‌دا د.ناتقی چه‌ندین وێنه‌ی پیشانی ئاماده‌بووان دا كه بۆیه‌كه‌م جار و له‌یه‌كه‌م رۆژی كیمیابارانكردنی هه‌ڵه‌بجه‌دا تۆماری كردون و وتی وه‌ك یه‌كه‌م فۆتۆگرافه‌ری ئێرانی نزیكه‌ی 300 وێنه‌ی كاره‌ساتی كیمیابارانكردنی هه‌ڵه‌بجه‌م گرتووه.
له چالاكییه‌كانی هه‌مان رۆژدا د.ئه‌حمه‌دی ناتقی سه‌ردانی بنكه‌ی ژین -كرد كه بنكه‌یه‌كی تایبه‌تی ئه‌رشیفكردن و دیكۆمێنتكردنی رۆژنامه و چاپه‌مه‌نی و كه‌لوپه‌لی چاپخانه یه.
له سه‌ردانێكی كورتدا د.ئه‌حمه‌دی ناتقی به یاوه‌ری مامۆستا ڕه‌فیق ساڵح سه‌رۆكی بنكه‌ی ژین به‌شه جیاجیاكانی بنكه‌كه‌ی به‌سه‌ركرده‌وه‌و به تێڕامانه‌وه رۆژنامه و ده‌ستنووسه ئه‌رشیفییه كوردی و عه‌ره‌بی و ئێرانییه‌كانی بینی.
له كۆتایی چالاكییه‌كانی ئه‌مڕۆیدا د.ئه‌حمه‌دی ناتقی، سه‌ردانی ناوه‌ندی رۆشنبیریی دكتۆر عزه‌دین مسته‌فا ره‌سوڵ -ی كرد.
له‌م سه‌ردانه‌شیدا مامۆستا جه‌زا ئه‌حمه‌د شاره‌زای بواری كتێبخانه و ئه‌رشیف، به وردی باسی پڕۆژه‌ی به دیجیتاڵكردنی كتێبخانه‌ی تایبه‌تی د.عزه‌دین مسته‌فا ره‌سوڵ ی كرد و ده‌ستنوس و كتێبه ئه‌رشیفییه‌كانی د.عزه‌دین-یشی پێشكه‌ش به د.ناتقی كرد.
سەرچاوە: pukmedia
