عەقڵی بێ عەقڵ

  غازی حەسەن

زۆربەی ئەوانەی دەیانەوێت بنووسن، یان قسە دەکەن و دەیانەوێت گوتار دروست بکەن، ئاماژە بەعەقڵ دەکەن. دەیانەوێت وا نیشان بدەن، کە ئاماژەکردن بە ئەم جۆرە دەستەواژانە، کەسایەتی و پێگەو توانای ئەو لەژینگەیەکی دواکەوتووی کشتوکاڵی و نەزانین و کوێرەوەریی و خۆخۆریی دوور لەهەڵویست و کاری ئەکادیمی و سیاسی مۆدرێن و رۆشنبیرێکی تازەگەر، دەگوازێتە بۆ سوپەر هێزو عەقڵ و کەسایەتییەکی کەم وێنەو کاریزما و خودان فکرێکی بێ هاوتا.

عەقڵ کردەیەکی فیزیکی و دەروونی و هۆشەکی و فکرییە، سەرچاوەی هەموو بڕیارو  کردارو کاردانەوەو شیکارو لێکدانەوەیەکە. عەقڵ هەر تەنیا هانی کەسەکان نادات، شتەکان ببینن، یان بگرن و بەکاربهێنن، بەڵکو پێش بڕیاردان، بەشێوەیەکی خێرا شتەکان لێکدەنەوەو شیکاری بابەت و روواوو ئەو ژینگەو دەوروبەرەشیان دەکەن، کە بابەتەکانی تێدا روودەدات.

پێچەوانەی ئەوە، زۆر لەو بابەتانەی دەیانخوێنینەوە، دوور لەم لۆژیکە نووسراون، باسی عەقڵ دەکەن، لەکاتێدا عەقڵ تێیدا بزرەو نامۆیە. باس لەعەقڵمەندی و عاقڵانە بیرکردنەوەو هوشیاریی و بەلۆژیک کارکردن دەکات، کەچی قسەو بۆچوونەکان بەکردەوە دوورن لەم وشە و گوزارشتانە، دوور نییە لەهەندێک دۆخدا دژیش دەردەکەوێت.

بەگۆترە نووسین، بەڕووکەشانە قسەکردن لەبارەی سیاسەت و رووداوەکان، دوورکەوتنە لەلۆژیکی بەراوردکاریی و ئاماژە نەکردن بە (باش و خراپ)، (هۆکارو ئەنجام)، (سەبەبکار و قوربانی) و چەندین بنەماو شتی دیکە، وا دەکات مرۆڤ بەئاسانیی و بێ بیرکردنەوە هەست بەوە بکات ئەم جۆرە نووسینانە عەقڵی بێ عەقڵن، دوورکەوتنەوەیە لەبیرۆکەی زانستیانە نووسین و هەڵسەنگاندن و هەڵێنجان و شیکاری گوتار.

عەقڵ پشت بەلێکدانەوەی پێشوەختە دەبەستێت، دوور دەکەوێتەوە لەهەڵچوون و تۆمەتی بێ بنەماو دەردی دەروونی خودە نەخۆشەکان، عەقڵ پشت بەبەڵگەو شتی سەلمێنراوو دروستکەر دەبەستێت، نەک تۆمەتی دروستکراو، هەواڵی دروستکراوو بڵاوکردنەوەی زانیاریی هەڵبەستراو، شکاندن و خۆشکاندن و پەڕپووت کردنی هەموو بەها پیرۆزەکان رەت دەکاتەوە.

هەر کاتێک عەقڵ بێ عەقڵ بوو، دەسەڵات و دەرفەت و هێزو گوتار کەوتە دەستی کەسانێک عەقڵ تەنیا بۆ خۆشکاندن و درۆو خۆڕیسواکردن بەکاربهێنن، عەقڵ ئەو بەهاو پێگە راستەقینەیەی نامێنێت، کەدەبێتە دروستکەر. کورد لەسەردەمی دوورکەوتنەوە لە (عەقڵ و لۆژیک و گفتوگۆی خۆ بەخۆ دەژیت)، چونکە شتەکان کەوتوونەتە دەست عەقڵی بێ عەقڵ!  وەکو چۆن کەسانێک باس لەفکر دەکەن، کەچی لەنێو بێ فکریدا خنکاون، باسی دادپەروەریی دەکەن، خۆیان توندتیرن و یەکەمی بێڕکابەرن لەپێشێلی یاسا، هەیانە خیانەت بەسیاسەت دەزانێت، هەیە لەنێو فۆرمی بێ فۆرمدا قۆپاوەتەوە.

هەر گاڤێک عەقڵ لە عەقڵ داپچڕێنرا، سەردەمی شەرم نەکردن لە بەرپرسیاریەتی، نەترسان لە مێژوو باڵادەستبوو، یان گوێ نەدان بەڕاستگۆیی و بەئاشکرا پێچەوانە کارکردن دژی بەرژەوەندییە نیشتمانییە گشتییەکان رەوایەتی پێدراو ریسوایی وەکو شانازیی سەیر کراو شکان وەکو سەرکەوتن و تەسلیم بوون وەکو هێز وێنا کرا، دەبێت بزانین عەقڵ و دەسەڵاتی عەقڵ لەسێدراە دراوە. هەر گاڤێک عەقڵ قووندە بوو، عەقڵ وەکو ئاشی ئاو لێبڕاوی لێهات، داگیرکەر بەڕزگارکەرو خودشکان بەفکرو سیاسەت زانراو درۆ وەکو بڕیاری شاهانە لێکدرایەوە، هەواڵ و زانیاریی ساختە بەپیرۆز ناوبرا... تاد. ئەوە دەبێت گومانمان نەبێت، کەئێمە لەسەردەمی مردنی عەقڵ دەژین. لەم دۆخەشدا کەسانێک کە باسی عەقڵ دەکەن ڕێک وێنەی بێ عەقڵی نمایش دەکەن، چونکە سەردەمەکە سەردەمی ڕیسوایی و شکان و تەلسیم بوون و خۆشکاندن و هەڵوەشانەوە و پووچییە!. 

سەرچاوە : هاوڵاتی