رووداو دیجیتاڵ
پێنج وڵات گروپە هونەرییەکانیان ناردووەتە رانیە لەگەڵ گروپەکانی باشووری کوردستان و عێراق بەشداری لە نۆیەمین فێستیڤاڵی نێودەوڵەتیی کولتوورە جیاوازەکان دەکەن.
رۆژی هەینی، 13ـی تشرینی یەکەمی 2023، فێستیڤاڵەکە لە پارکی دەروازەی رانیە دەستیپێکرد، بۆ ماوەی دوو رۆژ لەو شارە بەردەوام بوو لە رۆژی سێیەمدا گروپەکان چوون بۆ ناوچە گەشتییەکانی کۆیە و چالاکیان پێشکەشکرد.
خالید قادر، بەڕێوەبەری دەزگای رایەڵ بۆ ئاڵوگۆڕی کولتووری و گەشەپێدانی مرۆیی، بە رووداوی راگەیاند، فێستیڤاڵەکە نەریتێکی ساڵانەی دەزگەی رایەڵەیە، ئەم ساڵ سەرباری ئەو دۆخە سیاسی و ئابووری و ئەو قەیران و شەڕەی دەرووبەری هەرێمی کوردستانی گرتووەتەوە، بەڵام بە باشیان زانی خولی ئەم ساڵ ساز بکرێت، بۆ ئەوەی هونەر قسەی خۆی هەبێت بۆ ژیاندۆستی، پێکەوەژیان و ئاشتی.
ئەو چالاکییە هونەرییە لەلایەن دەزگای رایەڵ بۆ ئاڵوگۆڕی کولتووری و گەشەپێدانی مرۆیی سازکرا. گرووپە هونەرییەکانی هەولێر، سلێمانی، دهۆک و رانیە لە باشووری کوردستان و بەغدا و بەسرە لە عێراق و هەریەکە لە وڵاتانی یۆنان، جۆرجیا، ئێران، غانا و ئازەربایجان لە فێستیڤاڵەکەدا چالاکییان پێشاندا و میوان بوون.
سەرچاوە : ڕووداو
