محەمەد خۆشناو
لەجیهانێکدا دەژین زۆر دژوار و تڕاژیدیایە ، هەر کەس خەریکی خۆیەتی و بایەخ بەخۆی دەدا و دەوروبەرمان شەڕ و ژاوەژاو و بومەلەرزەی سیاسی و ئابووری و کۆمەڵایەتی و ئارامی تێدا نیە ، وایلێهاتووە هەفتەیەک و ڕەنگە چەند مانگیک تێپەڕێت ئەندامە بەساڵاچووەکانی خێزانەکەت بەسەر نەکەیتەوە ، خەریکە خێزانی پێکهاتوو لە باپیر و داپیرە و باوک و دایک و منداڵەکان کۆتایی پێدێت ، سۆشیالمیدیا وا پێشکەوتووە کە پەیوەندی بە دەنگ و وێنە لەگەڵ باوک و دایک و ئەندامانی خیزان ئاسان بووە و ، سیلەی روحم نەماوە و کەسایەتی کوردی تووشی شیزۆفرینیا و ئیزدواجیەت بووە بەقسە قدیسە و کە هەڵسوکەوتی دەبینی نامەردی وەکو خۆی نیە ، متمانە و ویژدان زۆر لاواز بووە ، وەرە سەیر بکە لەسەر هەندێک سامان چ کارەساتێک بەسەر خێزان دێت ، یان ئاگات لەخۆ نیە پاڵێکت پێوە دەنێن بۆ ناو بیرێکی قووڵ ، کەسی نامەرد ئەو کەسەیە کە نزیکتە و هاوکاری دەکەیت و دەیپارێزیت وەک دۆستێکی باوەڕپێکراو دایدەنێیت کەچی ناپاکیت لەگەڵ دەکات هەر لە دزیەکی بچووکەوە تا دەگاتە کوشتن و ، لەپشتەوە لێت دەدا ، نامەرد کەسێکی نمەک حەرامە بەجێتدەهێڵیت و پاشان هێرشت دەکاتە سەرت و پیلانت لێدەکات ، گەشتکردن لەگەڵ نامەرد یان گورگ گەشتێکی دڵنیاکەرەوە نیە و نوستن لەگەڵی نوستنێکی خۆش نیە ، تەنگوچەلەمەکە لە نامەرد نیە ، بەڵکو لەوەیە کە سایکۆلۆژیەتی نامەردەکان پشتگوێ دەخەیت ، کە بڕوای بەوە هەیە کە تاکە هەقیقەت کە نامەردیی پێ جیا دەکرێتەوە لەناو هەناوە دڕندەکەیدایە ، تۆ نازانیت فلان کەس نامەردە تا ئەوکاتەی پێتوەدەدات و ، ئاخر ئەوان لافیتەی نامەردی-یان لەسەر نیوچاوان هەڵنەواسیوە تا گۆشەگیریان بکەیت و لە شوێنێکی ئارامیان دابنێیت تا مومارەسەی نامەردیی بەرانبەر یەکتری بکەن ، ئەزموونی ژیان دەریخستووە کە هاوڕێی شەڕانگێز هەمیشە توانای ئەوەی هەیە کە سروشتی خۆی بشارێتەوە تا ئەو کاتەی بەڕێکەوت ئاشکرا دەبێت ، زۆر جار دەسەڵات و کۆمەڵگەش ڕێگە بەکەسانی نامەرد دەدات کە بە ئازادی و بێ کۆت بێن و بچن و گەشە بکەن ، تۆ ئەگەر منداڵەکانت لەسەر ڕاستگۆیی و ئەمانەت پەروەردە کرد ، بەمە کۆمەڵگەیەکی باش دروستدەبێت ، بەڵام کاتێک دەسەڵات و کۆمەڵگا پاداشتی خەڵکی خراپی دا و پیاوە ماقوڵ و کەسایەتی کۆمەڵایەتی پێبەخشی و ڕێگەی بە درۆ و فێڵ و فریوداندا بۆ خۆڕزگارکردن لە دڕندەیی ژیان ، ئەوە هەموو هەوڵەکانت بۆ پەروەردەی منداڵەکانت لەسەر ڕاستگۆیی و ئازادی بەر تاشەبەرد دەکەوێت چونکە ئەو چەکە شیاوەت وەک ئەوەی ئەوان پێنیە بۆ مامڵەکردن لەگەڵ ژیان و بەمەش دەبیتە قوربانی ، واتلێدێت ناتوانیت خۆت بەرانبەری ڕابگریت ، نامەردەکان بوکەڵە نین بۆ گەمەکردن ، ئەوان دەتوانن گەمە بە خەڵک بکەن و تەکتیکاتی کارکردن بگۆڕن ، ئەو هەڵوێستە باشەی کە هەندێ جار پێشانی دەدەن تەنها هەندێکە لەو تەکتیکایەتیە ، سێ لە فەیلەسوف و هزرمەندی گەورەی ڕۆژئاوا باسی سێ لە مەترسیدارترین شەیتان لەناو مرۆڤ کردوە کە نامەردەکان و کەسانی شەڕانگێز پەیڕەوی دەکەن ، یەکەم « کارل مارکس » شەیتانی سامان و ململانێ لەسەری ، دووەم « فەرەدریک نیتشە » شەیتانی هێز ، سێیەم « سیگمۆند فرۆید » شەیتانی شەهوەی سێکسی ، ئەو سێ غەریزە ئاژەڵیە لە مرۆڤ بۆتە فەلسەفەی وجودی مرۆڤ و ، مرۆڤ بەرەو مەترسیدارترین شەڕانگێزی دەبات کە نامەردەکان بەشێکن لێی کە بۆ تێرکردنی غەریزەکە سڵ لەهیچ شتێک ناکەنەوە ، ئەم سێ شەیتانە بۆتە ئامانجی باڵای ئادەمێزاد ، بزانە لەسەر سامان چ کارەساتێک ڕوودەدات ، سەیری ئەو هەموو کوشتنە بکە !! وەرە سەیری هێز و کۆنتڕۆلکردن و دەسەڵاتداریی بەسەر ئەوانی تر بکە تەنها بۆ ناچارکردنیان بۆ ملکەچی ، تێربوون لە شهوەی سێکسی بێسنوور کارەساتی گەورەی نایەوە ! جا دەشێت ئەو سێ غەریزەیە لە یەک مرۆڤ کۆبکرێنەوە ، ئەوجا دەبێت چ جۆرە دڕندەیەکی ماڵوێرانی لێدەرچێت !! ئەوانەی چێژ لە ڕاستگۆیی شەڕانگێزە سایکۆپاتیەکان وەردەگرن ، هەق وایە خۆیان لێیان ڕزگار بکەن : ئەوان دەتوانن شێر و پڵنگ کەیی بکەن ، بەڵام ماڵیکردنی نامەرد ناکرێت و نابێت !
سەرچاوە : سپی میدیا
