ئەنجومەنی باڵای دادوەری عێراق، ئامارێکی نوێی رێژەی جیابونەوەی هاوسەرانی بڵاوکردەوە کە لەمانگی رابردودا زیاتر لەشەش هەزار دۆسیەی جیابونەوە تۆمارکراوە، بەمەش دەردەکەوێت لە کاتژمێرێکدا هەشت حاڵەتی تەڵاق هەیە، هاوکات پزیشکانی پسپۆڕ پێشبینیدەکەن، ئاماری ڕاستەقینە دەگاتە زیاتر لە 10 هەزار حاڵەت تەڵاق لەسەرتاسەری عێراق ئەگەر رێژەی جیابونەوە لە هەرێمی کوردستانیش هەژمار بکرێت.
لە ڕاگەیەندراوەکەی دەسەڵاتی دادوەریدا هاتوە، لە سەرتاسەری وڵاتدا شەش هەزار و 344 حاڵەتی جیابونەوە تۆمارکراون، جگە لە پارێزگاکانی هەرێمی کوردستان، واتە ڕۆژانە زیاتر لە 200 حاڵەتی جیابونەوە لە دادگاکانی عێراق تۆماردەکرێن، بەمەش لە هەر کاتژمێرێکدا هەشت حاڵەتی جیابونەوە تۆمارکراون.
لە مانگی (کانونی یەکەم/12)ی 2022دا، نزیکەی چوار هەزار و 500 حاڵەتی جیابونەوە تۆمارکراون
ئەو دەرئەنجامەی مانگی ڕابردو ڕاگەیەندرا بەرزترین ئاماربو لەچەند مانگی رابردودا، بەجۆرێک بەپێی دواین ئاماری ئەنجومەنی باڵای دادوەری عێراق لە مانگی (کانونی یەکەم/12)ی 2022دا، نزیکەی چوار هەزار و 500 حاڵەتی جیابونەوە تۆمارکراون.
دادگاکان شەش هەزار و 344 دۆسیەی جیابونەوەیان تۆمارکردوە
ئەنجومەنی باڵای دادوەری ئاماژەی بەوەکردوە، دادگاکانی عێراق، لە ماوەی مانگی یەکدا، شەش هەزار و 344 دۆسیەی جیابونەوەیان تۆمارکردوە، بەراورد بە سێ هەزار و 106 دۆسیەی هاوسەرگیری کە لە دادگاکانی عێراقدا بەڵگەیان لەسەرە و تۆمارکراون.
بەغدا، بەسڕە، نەینەوا، نەجەف، کەربەلا و کەرکوک لەو پارێزگایانەن کە زۆرترین ڕێژەی تەڵاقیان تۆمارکردوە
هەر بەگوێرەی ئامارەکە، بەغدا، بەسڕە، نەینەوا، نەجەف، کەربەلا و کەرکوک لەو پارێزگایانەن کە زۆرترین ڕێژەی تەڵاقیان تۆمارکردوە لە ماوەی مانگی ڕابردودا، لە کاتێکدا ئەنبار و سەڵاحەدین کەمترین رێژەیان تۆمارکردوە.
ئامارەکان زۆر زیاتر دەبن ئەگەر ئاماری پارێزگاکانی هەرێمی کوردستانیش هەژماربکرێن
هەنا عەسەل ئەندامی سەندیکای پارێزەرانی عێراق لە لێدوانێکدا رایگەیاندوە، "ئامارەکان زۆر زیاتر دەبن ئەگەر ئاماری پارێزگاکانی هەرێمی کوردستانیش هەژماربکرێن، لەوانەیە مانگانە 10 هەزار حاڵەتی تەڵاق تێپەڕێنێت، لەکاتێکدا تەڵاقی زارەکی و ناکۆکییەکانی ناو دادگاکانیش تائێستا پەسەندکراون".
زۆربەی حاڵەتەکانی تەڵاق دەرئەنجامی فشارەکانی ژیانەوەن
هەنا عەسەل دەشڵێت، "زۆربەی حاڵەتەکانی تەڵاق دەرئەنجامی فشارەکانی ژیانەوەن، وەک هەژاری و بێکاری، جگە لە هاوسەرگیری پێشوەختە، هەروەها نەبونی توێژەری کۆمەڵایەتی کە ڕەنگە ڕۆڵی چاکسازی لەم بوارەدا بگێڕن".
بەرپرسیارێتی باوک و دایکی کچە کە لە تەمەنێکی بچوکدا ڕەزامەندییان دەربڕیوە کچەکەیان بەشو بدەن
ئاماژەی بەوەشکردوە، "بیرۆکەی هاوسەرگیری لەگەڵ کچێکی خوار تەمەنی 18 ساڵ و دواتر جیابونەوەی دوای چەند مانگێک، بە بیانوی تێنەگەیشتن، بابەتی نەبونی پێنەگەیشتوییە لەلایەن ئەو پیاوەی کە هەڵگری گەورەترین بەرپرسیارێتی سەرکەوتن یان شکستی خێزانەکەیە، جگە لە بەرپرسیارێتی باوک و دایکی کچەکە کە لە تەمەنێکی بچوکدا ڕەزامەندییان دەربڕیوە کچەکەیان بەشو بدەن".
پێویستە هەڵمەتی هۆشیاریی گەورە هەیە سەبارەت بە لێدان و توندوتیژی دژ بە ژنان لە عێراق ئەنجامبدرێت
لای خۆیەوە محەمەد عەدنان چالاکوانی مافی مرۆڤ لە بەغدا دەڵێت، "پێویستە هەڵمەتی هۆشیاریی گەورە هەیە سەبارەت بە لێدان و توندوتیژی دژ بە ژنان لە عێراق ئەنجامبدرێت، چونکە ئەم توندوتیژیانە پاڵ بە جیابونەوە لە نێوان هاوسەرەکان لە دادگاکاندا دەنێت، لەلایەن خێزانی ژنەکەوە یان خودی ژنەکە خۆی".
حاڵەتی جیابونەوە هەیە کە پەیوەندی بە خراپ بەکارهێنانی ئینتەرنێت و گومانەوە هەیە
محەمەد عەدنان دەشڵێت، "حاڵەتی جیابونەوە هەیە کە پەیوەندی بە خراپ بەکارهێنانی ئینتەرنێت و گومانەوە هەیە، بەڵام هەژاری و بێکاری و ماددە هۆشبەرەکان و دەستوەردانی خێزان هۆکاری سەرەکین بۆ زیادبونی رێژەی تەڵاق لەناو کۆمەڵگەدا، بەتایبەتی کە بیرۆکەی سەربەخۆیی ماڵ بۆ ژن و پیاو، کە ئەمڕۆ بۆ گەنجان قورس بوە ماڵی جیایان هەبێت بەهۆی زۆری تێچوی خانوبەرە لە عێراق".
زیاتر لە 25%ی ژنانی عێراق پێش گەیشتن بە تەمەنی 18 ساڵی، هاوسەرگیری دەکەن
ڕیتا کۆڵۆمبیا نوێنەری سندوقی دانیشتوانی نەتەوە یەکگرتوەکان لە بەغدا لە چاوپێکەوتنێکی پێشودا ڕایگەیاندبو، زیاتر لە 25%ی ژنانی عێراق پێش گەیشتن بە تەمەنی 18 ساڵی، هاوسەرگیری دەکەن و بەڕێژەی 10.5%یان پێش تەمەنی 15 ساڵی هاوسەرگیری دەکەن.
نوێنەری سندوقی دانیشتوانی نەتەوە یەکگرتوەکان بە ئاماژەدان بەوەی کە لە 10 ساڵی ڕابردودا رێژەی تەڵاق زیادیکردوە، جەختی لەوە کردەوە، "ئەم ئامارانە کارەساتبارن".
سەرچاوە : سایتی خەندان
