چیرۆکی : نەوزاد بەندی
ئەو بنەماڵەیە هەر هەموویان پلەی دکتۆرایان هەبوو ..بە یەکتریان ئەوت پڕۆف یان یائپڕۆڤ ..وەک ئاماژەیەک بۆ پڕۆفیسۆر و یاریدەدەری پڕفیسۆر ...تێکڕایان تێکسمڕاو بوون ، ملئەستوور و.. قاچ و شان کۆتەرە ، لە دوورەوە لە کەرتە شاخ ئەچوون ...باپیرە گەورەیان دکتۆرای لە نانەقەیسیدا هێنا بوو ، پرسیارێکی بێ وەڵامی وروژاندبوو ، ئاخۆ نان پێش قەیسییە یان قەیسیی پێش نان ؟ ..خۆی تێزی دکتۆراکەی لەسەر ناوساجی بوو کاتێ بە بنی تاوەوە ئەنوسێ ...برا گەورەکەی یاریدەدەری پڕۆفیسۆر بوو ، لە بواری قنچکی پیازدا ...خوشکێکیان هەبوو ، زۆر ناشیڕین بوو ، پێیان ئەوت لوت باینجان ، دکتۆرای لە بواری گیزەی مێشولەدا هێنابوو لە شەوی یەڵدادا ، بە پلەی نایاب .. یەکێک لە توێژەران خۆی پێ نەگیرا بوو ، هەتا هێزی تێدا بوو ، جڕتێکی لێ دا بوو ، جا نەڕاندبووی : لە شەوی یەڵدادا نەک مێشوولە ، تەنانەت شەمشەمەکوێرەیش لە سەرماندا ، نایەتە دەرەوە و لە لە ساتیرەی ئەشکەوتێکا بۆ خۆی خەریکی جۆلانەکردنە ..
هەر ئەو کات و ساتە ، دوو شینە زەلام ، توێژەرەکەیان وەک پارچە فلینێک هەڵگرتبوو و بردبوویان ، ئیتر توێژەر خۆتان خۆش .. ئەو هەموو زانا و دانایه ، هەر نەیشیانپرسی بوو ئاخۆ توێژەرەکە بە چ شێوەیەک کوژراوە ؟ یان چۆن نێژراوە ؟
مامێکیشی هەبوو دکتۆرای بە پلەی زۆر باشە ، لە جیڕەی دەرگادا هێنا بوو ، بە تایبەت لە شەوانی زستاندا ... ئەوەندە بە جوانی ئەو جیڕە جیڕەی لێکدابۆوە ، حەزت ئەکرد نەک هەر دەرگاکانی ماڵەوە ، تەنانەت دەرگای مزگەوت و ئوتومبیل و هێلانەی مریشکیش جیڕەیان تێ بکەوێ ، ئەمیش لە خوای ئەویست ، هەر دوای تێزە بە پێزەکەی ، زانکۆیەکی گەورەی دامەزراند ، درەختی دانسقەی وای بۆ هێنا بوو ، نرخەکانی پیاوی تووڕە ئەکرد ، بۆ نمونە درەختێک هێندەی قەلێکی سوور ئەبوو ، نرخەکەی چل هەزار دۆلار .. لەو زانکۆیەدا ، کوڕە زۆر دەوڵەمەند و دەستڕۆیشتووەکان فێری جیڕە جیڕ ئەکران ..چۆن دەرگایەک یان پەنجەرەیەک دێنیتە جیڕە ..یەک کۆرسی تەواو لەسەر جیاوازی نێوان جڕت و جیڕە دەڕۆیشت ..ئەمانیش هەڵبەت هەر وا بە ئاسانیی نایخۆن ، چونکە کۆمپانیاکانی زەیتی دەرگا و دەڕابە هاواریان لێ بەرز بۆوە ، ئێ وای لێهاتبوو بەرهەمەکانیان لە بازاڕەکاندا ساغ نەدەبوونەوە ..خەڵک بەجۆرێ ئاڵودەی جیڕە بوو بوون ، بابت بکوشتنایە ، بەس باسی ڕۆنی نەرمکردنی ئەنجامەی دەرگات بۆ نەکردنایە .. ئەمان پشتیان قایم بوو ، بە داواکاری گشتییان وتبوو هەر دەوایەک دژی جیڕەی دەرگا بەرز کرایەوە ، لوولی کە و بیخەرە تەنەکەی خۆڵەکەوە و خاوەنەکەیشی بە مادەی پەنجا و شەشی تیرۆر سەرنگون بکەن ...کار گەیشتە ئەوەی هیچ کورسییەکی بەتاڵ له زانکۆی جیڕە جیڕ نەمایەوە و ..زانایەکی زۆری تیا بەرهەم هات ، کە لە ئاهەنگی دەرچوونیاندا ، زیاتر پاو پوز و ڕانی سپی خانمان نمایش دەکران ، کە هیچ پەیوەندییەکیشی بە جیڕەوە نەبوو ، بەڵام ڕاستەوخۆ لە زانکۆیەکی ئەسکەندنافییەوە وەرگیرا بوو ..جێی شانازی و چاو لەوەڕاندن بوو ..
خوارزایەکیان دکتۆرای لە موشێندا هێنابۆوە ، لە ئەدنبەرە ی بەریتانیا ، یاسای زۆر سەرسوڕهێنەری لەو یارییە میللیەدا داهێنابوو ، بۆ نمونە بە بەڵگەوە حاڵەتی ( حەپولکی ) ڕەت کردبۆوە ، چونکە تۆ کە حەج ئەکەیت ، یان یاری ، هیچ پێویست ناکا بە حەپولکی سڕ بکرێی .. ئەمەیش وایکرد بازرگانیی هەڵمات و گلۆر پێشکەوتنێکی بەرچاو بە خۆیەوە ببینێ ، بە تایبەت دەرچووی کۆلێژ و پەیمانگاکان زۆر بە دڵشادییەوە دادەنەوینەوە وەک چۆن لەسەر سیفۆنی ئاودەستی ڕۆژهەڵاتیی دادەنیشیی ، ئا بەو شێوەیە ، سەریان بۆ هەڵماتەکان نەوی دەکرد ، بۆ ئەوەی یارییەکە بەردەوام بێ ...کوڕ ئەو کوڕە بوو موشی زۆر بباتەوە ، ئەوە لە ئەولەویاتی کارەکانیان بوو ...
خاڵۆزایەکیان دکتۆرای لە خاڵخاڵۆکەدا هێنا بوو .. دەرمانێکی دۆزیبۆوە ، لە توانایدا هەبوو خاڵەکانی سەر باڵەکانی خاڵخاڵۆکە بسڕێتەوە ، بەوەیش ناوەکەی گۆڕی بۆ باڵباڵۆکە ، یان کاڵکاڵۆکە ... شایانی باسە ئەم تێزی دکتۆرایە کە لە تۆڕە کومەڵایەتییەکاندا بڵاو کرایەوە ، لە پێنج خولەکی یەکەمدا ، سیانزە ملیۆن لایک و .. دە ملیۆن کۆمێنتی دەستخۆشیی بۆ خۆی کۆکردەوە ..ئەمە وایکرد یاریزانە جیهانییەکان پەیوەندی پێوە بکەن و داوای لێ بکەن خاڵەکانیان بۆ لێبکاتەوە ..لە بەرامبەر هەر خاڵێکدا ، چەند پارەیش داوا بکا ، ئامادەن بیدەنێ ، بەڵام ئەو هەستی نیشتمانیی بەسەریدا زاڵ بوو ، لە کۆنگرەیەکدا ، تابلۆی خاڵخاڵۆکەیەکی بەرزکردەوە و نەڕاندی : هەتا خاڵی خاڵخاڵۆکەکانی نیشتمانەکەم وەستابن ، خاڵ بۆ باوکیشم لێ ناکەمەوە .. هەرچی سەروەت و سامانی دنیایەیە بیخەنە بەڕکمەوە ، نەک خاڵێک ، نیو خاڵیشتان بۆ لێ ناکەمەوە ..
ئەڵێن کەس چەپڵەی بۆ ئەو داستانە لێنەدابوو ، هەر بۆیە خەڵکێکی زۆر دەستگیر کرابوون و .. حوکم درا بوون ، هەندێکیشیان سەرنگووم کرا بوون ..
سەرچاوە : ئاوێنە
