بێکەس بەرواری
بەشی دووەم..
ئەرێ کیش ژوان مرۆڤێن زێدەتر یێ سەربەستە دهزرکرنێ دا وئازادە دبڕیاردانێ دا یان نە ؟
هندەک بەرسڤ دوێ باوەرێ دانە کو بەرسڤا هەرە ڕاست ئەوە کو ئاین ، ئایدیۆلۆژیەت و ڕێباز پەرستی هزر وتێڕمانین وبڕیاردانێ دژیانا مرۆڤی سنوردار دکەت وگەلەک جارا مرۆڤ دبیتە مرۆڤەکێ کۆنسەرڤاتیڤ ودەمارگیر یانژی بێژین مەژی هشک وباوەر پتنێ ب ئاین وهزر وئایدیۆلۆژیایەک دیارکری هەیە ودناڤ بازنەیەکێ دیارکری دا دزڤڕیت و دوێ باوەرێ دایە کۆ هزر و ئاین وئایدیۆلۆژیایا وی پتنێ یا هەرە راست و دروستە وهەمی هزر و بیر وتێڕمانینێن دی دشاش ودبێ بنمەمانە و بتایبەت ژی مرۆڤێن ئایندار چنکو ھزرێن مرۆڤێن دیندار ژ ھزرێن مرۆڤێن دیترە و ژچەند پەڕتوکێن دیارکری و بڕیار ل سەر دای ژلای ھێز و کەسێن دی ڤە هاتینە ساز وئامادەکرن وبەڵاڤکرن ولژێر ناڤێن جودا جودا وکەسایەتی وهێزێن پیرۆز وباڵا دەست و مروڤێ دیندار د ترسیت و نەشێت گوھڕانکاریێ دوان ھزران دا بکەت و بەلکی وەسا دزانیت کو مافێ ھزرکرنێ و گوھڕێنێ و ڕەتکرنا وان ھزرا نینە لەو ژبەر وێ ترس و دوودلی و نە پشت ڕاستی دژێدەرا دا ھەردەم بھزرێن بەرتەنگ تر دھزریت و گەنگەشێ دکەت و دناڤ دەرونێ وی دا ئەو ئاڵۆزی یا ھزری دبیتە ئەگەرێ بێھن تەنگی ودەنگ بلندیێ ودەمارگیریێ .
بەلێ لڤێرێ ئەم نەشێین بێژین کو مرۆڤێن ئۆلدار وئایدیۆلۆژیست وڕێک و ڕێباز پەرست دنەزانن یانژی نە دڕەوشەنبیرن ،هێشتا مرۆڤایەتی نەگەهشتی یە ئاستەک ڕەها دهشمەندیێ دا ، چنکو هندی مرۆڤایەتی هەیی ،هەردەم گوهڕێن وپێشکەفتنێن بەردەوام ژی یێت هەین ودێ ئەڤ گەشەپێدان وپێشکەفتنە دبەردەوام بن. لەوما دێ هزرێن مرۆڤان ژی دگوهڕانکاریێن بەردەوام دا بن و لگوڕ سەردەم وجهێن مرۆڤان دێ هزرێن مرۆڤان ژی دگوهڕینێن بەردەوام دابن .
بەلکۆ ئەم دشێین بێژین هندی ئەو دهزرمەندبن ودگەلەک بیاڤا دا دشەهرەزا ودمەلەڤان بن ،لێ دهەمان دەم دا نەشێن خوە ژقەید وبەندێن هزرێن خوە یێن ئاینی یان ئایدیۆلۆژی ئازاد بکەن وهزرێن دی قەبوڵ بکەن وهزرێن خوە ڕەت بکەن و وان دیورا وسنورێن بو هاتینە دروستکرن بهەڕفینن وتێک بشکێنن. وهزرێن وان وڕێ و ڕێبازێن وان یێت هاتینە دیارکرن ودەست نیشانکرن وەکی ڕێکەک ژبو بەردەوامی دان دژیانەک ئاراستەکری دا و دچوارچوڤە وسنورێن دیارکردی دا.
باشە پا مرۆڤێن نەئاین دار یانژی ڕاستتر بێژین نەگرێدایی وپابەند بئاینەک ، یان ئایدیۆلژیا وڕێک وڕیبازەک دیارکری ڤە دچاوانن وتێهزرینا وان چاویە ؟
ڕەنگە ژبو بەرسڤدان لسەر ڤان جوەرە پرسیاران پێتڤی ب پرسیارێن دیژی هەبیت لەوما دڤێرێ دا پرسیارەک خوە دهاڤێتە گوڕەپەنا هزرکرنێ ئەوژی ئەڤ پرسیارەیە :
ئایا کیش مرۆڤ یانژی کیش ڕەوشەنبیر یێ ئازادترە ؟
بێ گۆمان ئازادی یا هزری ژ سەربەستی یا دهزرکرنێ دا دەست پێ دکەت ،هەکە مرۆڤ یێ سەربەست بیت دهزرکرنێ دا وهەردەم ل بەرسڤا پرسیاران بگەڕهیت وژوان بەرسڤان پرسیارێن نویتر دروست بکەت وهەردەم ل ڕاستیێن هەرە ڕاست بگەڕهیت و جو جاران هزر وبیر و مەژیێ خوە ڕادەستی هزرێن نە گوڕ نەکەت و هەردەم بزانیت ڕاستی ١٠٠٪ نە لایەکێ کێشە وبابەتانە و ڕاستی گەلەک جارا یا چەند لایەنە و لگوڕ دەم و دەرفەت وجهێن ڕویدانان ئەو لایەنێن جودا یێن ڕاستی یا دیاردبن ،وهەردەم دیتنا تشتان بچەندین بەرچاڤکێن جودا ونێڕینێن جودا وژلا وجهێن جوداڤە دهێنە گوهڕێن .نمونەیا دارستانان ودیتنا وان دارستان ژ چەندین لایان ڤە ودچەندین سەردەمێن جودا دا گوهڕێن تێدا چی دبیت ،هەکە مرۆڤ ل بلنداهێ بەرێ خوە بدەتە دارستانەکێ ، یانژی مرۆڤێ ژلایێ ڕۆژەهەلاتی ڤە ،یانژی ژلایێ ڕۆژ ئاڤا ،ئان باکور ئان باشورڤە بەرێ خوە بدەتە هەمان دارستانێ ، بێ گومان دیتن و نێڕێن ژلایێن جوداڤە دێ بیتە ئەگەرا دیتنا چەندێن ڕاستیێن جودا جودا و هەر وەسا ئایا مرۆڤ بشەڤ یان ڕۆژ یانژی سپێدێ یان ئێڤاری بەری خوە ددەتە ڤێ دارستانێ ل ڤێری دیار دبیت کە دەمێن بەرێ خوە دانێ ژی دبنە ئەگەرا گوهڕینا دیتن و هزران ، هەروەسا ئەگەر مرۆڤ بچیتە دناڤ وێ دارستانێ ژی دا و لناڤ هەمی دارستانێ بگەڕهیت نابیتە ئەگەر دیتنەکا ڕاستیەکا ١٠٠٪ جونکی ئەوێن ژلایێن جودا جودا ول دەبێن جودا جودا بەرێ خوە دایە ڤی دارستانێ دیتنێن جودا جودا هەبوونە . لەوما نێڕین وتێهزرین دبابەتان دا پێتڤی ببچون و دید و هەڵسەنگاندنێن جودا جودا هەنە .
