سازیان شەهید تاڵیب
هەواڵەكانی كوشتنی ژنان لە هەرێمی كوردستان رۆژ بە رۆژ لە زیادبووندایە. ئەوەی جێگەی مەترسییە بێباكی و بێخەمی دەسەڵات و داواكاری گشتی و لایەنە پەیوەندیدارەكانە، تەنانەت لە بڵاوكردنەوەی ئاماری قوربانیدانەكانیشدا سڵ دەكەنەوە و بەڕاستی ئەو ئامارانە ناخەنەڕوو. تادێت گۆڕستانی ژیان* گەورەتر دەبێت و رێكخراوەكانی ژنان و ئافرەتان و كۆمەڵگەی مەدەنی فریای ئەو هەموو ناڕەزایەتی و بەیاننامانە ناكەون، گردبوونەوە و چالاكی سەر شەقام و دەنگ هەڵبڕینەكان تەنها دەبنە وێنەی ناو سۆشیال میدیاكان و بەرپرسێكی گرنگ نایەتە سەر هێڵ، تا پێكەوە دەست بخەینە سەر ئازارەكان و بەیەك دەنگ هاوار بكەین نا بۆ كوشتنی ژنان بە پاساوی جۆراوجۆر.
بیانووەكان بۆ كوشتنی ژنان زۆرن كارگەیشتۆتە ئەوەی كوشتن لەژێر پەردەی پاراستنی شەرەف نەماوە، بە بەڵگەی ئەوەی ئێستا لە پێناو ئەوەی ژنێك نایەوێت شەرەفی لەكەدار بكرێت دەكوژرێت، كوشتنی دووخوشكی پزیشك لەگەڵ دایك و باوكیان بەڵگەی ئەو راستییەن كە كوردستان بۆتە مۆڵگەی پیاو كوژان كە بە ئارەزووی خۆیان بەناو شەقامەكاندا پیاسە دەكەن، بە بیانووی نەبوونی بەڵگەی پێویست ئازاد دەکرێن و بە بەرچاوی كەسوكاری قوربانییەكانەوە دێن و دەچن، بەداخەوە فەتوای نادروست و بەناوی ئیسلامەوە دەردەکرێن کە توندوتیژیی گەورەی لێ دەکەوێتەوە.
پاڵنەرەكانی پشتی كوشتنی ژنان
پاڵنەرەكانی پشتی كوشتنی ژنان ئەگەر جارێك ناحاڵیی بوون و تێنەگەیشتن و ئەقڵی چەقبەستووی زۆرینەی پیاوانی كۆمەڵگە بێت، چەندینجار بەهۆكاری وتار و هاتوو هاواری هەندێك لە پیاوانی ئاینییەوەیە، كە بەردەوام مینبەرەكانیان كردۆتە باسی ژن و شەرەف و ئەو ئەخلاقەی ئەوان پێوەریان بۆ داناوە. بەوەشەوە ناوەستن مینبەرەكانیان گواستووەتەوە بۆ نێو سۆشیال میدیا و ماف بەخۆیان دەدەن دەست ببەن بۆ تەواوی ژیانی ژن و بەئاشكرا كۆت و بەندیان كردووەتە دەم و دەست و چاو و بیركردنەوەی ژنانەوە. ئەوەی جێگەی سەرسوڕمانە بەشداریكردنی پیاوان و گەنجان لەناو ئەم تۆڕە كۆمەڵایەتییانەدا بە ئاڕاستەیەكە كە بیریان چووەتەوە ژن دایك و خوشك و هاوسەریانە، ژنانێكیش كە بوونەتە زمانحاڵی بەناو مەلاو ئەو پیاوە ئاینییانەی تەنها باسی ژن و شەرەف دەزانن، هێنانی ژنی دووەم و زیاتر بۆتە بەشێكی باسەكانیان و دواجار لێكەوتەی لەم جۆرە كوشتنانەی لێدەكەوێتەوە. خۆ ئەگەر ژیانی خۆشیان سەیر بكەیت پڕیەتی لە نایەكسانی و ناڕوونی و چەواشەكاریی بەئاشكرا لە چاوپێكەوتنەكانی خۆیاندا ئەوە باس دەكەن، خۆیان نایانەوێت ژنی دووەم بهێنن، بەڵام لە وتارەكانیاندا هانی پیاوان دەدەن بۆئەوەی ژنی دووەم و زیاتر بهێنن، بەمەش خێزانەكان لەبەریەك هەڵدەوەشێننەوە، لەجیاتی تەبایی و یەكڕیزیی خێزان دەبینین توندوتیژیی و لێدان و جیابوونەوە و تەڵاق و دواجار سەركێشا بۆ كوشتنی لێكەوتەوە، لەبارەی منداڵ و داهاتوو و ژیانیان هەرباس ناكرێن.
پاڵنەرەكانی پشت كوشتنی ژنان، ئەگەر جارێك ناحاڵیی بوون و ئەقڵی چەقبەستووی زۆرینەی پیاوانی كۆمەڵگە بێت، چەندینجار بە هۆكاری وتاری هەندێك لە پیاوانی ئاینییەتاهانی توندوتیژیی پێبدرێت
من دەمەوێت لێرەوە ئەوە بپرسم:
ئایا مینبەری مزگەوت و كامێراكان و سۆشیال میدیا تەنها بۆ ئەوە كراوە هانی توندوتیژیی پێبدرێت؟
یان تەوەری قسەكردنەكانتان تەنها لە دەوری ژن بخولێتەوە؟
ئەی بۆ كەسێكتان بوێریی ئەوەتان نییە لەسەر هەموو ئەو نایەكسانییانەی دیكە قسە بكەن كە پەیوەندییان بە قوتی خەڵكی هەژار و كەم دەرامەتەوە هەیە؟
رۆژانی دواكەوتنی مووچە و خواردنی مافی مووچەخۆران كەس ناتوانێت ناڕازیی بێت و کام پیاوی ئاینیی بوێریی ئەوەی تێدایە كە پەنجە بخاتە سەر برینی جەستەی ئەم نیشتمانە كە رۆژانە بۆردومان دەكرێت و سنوری هەرێم دەبەزێنرێت و خاك و گوند و رەزی دەسوتێت، كەچی هیچ كام لەمانە ناوێرن هیچ كاردانەوەیەكیان هەبێت، تا ئێرە و بەس پێویستە سنور دابنرێت بۆ وتار و لێدوان و تەواوی ئەو بڵاوكراوە و گرتە ڤیدیۆییانەی لەنێو سایت و تۆڕە كۆمەڵایەتییەكاندا لەژێر پەردەی ئیسلام و بەناوە جۆراو جۆرەكانی چاكسازی كۆمەڵایەتییەوە خۆیان دەكەن بەناو هزری كۆمەڵانی خەڵكی كوردستاندا. پێویستە داواكاری گشتی لەسەر ئەوە بێدەنگ نەبێت و مەرجەكانی وتاردان و قسەكردن لە سۆشیال میدیا سنوردار بكات یان كەسانی شارەزا و پسپۆڕ بتوانن بە مۆڵەت و رێگەپێدانی وەزارەتی ئەوقاف وتارەکانیان پێشکەش بکەن..
هەموو ئەمانە لەپێناوی ئەوەی خێزانەکان بە ئارامی بژین دوور لەهەر جۆرە توندوتیژییەک و ژنان بتوانن بە ئارامی لەناو ماڵەكانیاندا ببنە دایك و خێزان و خوشكێكی تەندروست و سەركەوتوو.
سەرچاوە : هاوڵاتی
