ناوی ئارام مێلیکیانە و بە ئارام تیگرانیش ناسراوە، هونەرمەندێکە کە 50 ساڵ خزمەتی بە فەرهەنگی گۆرانی و میوزیکی كوردی كردووە.
ئارام تیگران، هونەرمەندێکی كوردزمانی بە ره‌چه‌ڵه‌ک ئەرمەنییە، ساڵی 1934 لە شاری قامیشلۆی ڕۆژئاوای کوردستان لەدایکبووە.
تیگران، عاشقی ئاواز و گۆرانی فۆلكۆری كوردی بوو، جگە لە دەنگبێژی، ژەنیارێکی بەتوانای ساز بوو، ئاوازدانەر بوو و زۆر لە گۆرانییەكانی خۆی ئاوازی بۆ داناون، بە گۆرانی “شەڤ چوو” دەستیپێكرد و بە گۆرانی “ئای دلبەرێ” ناوبانگی پەیداکرد.
بەرهەم و گۆرانییەکانی
ئارام هۆنراوەیەکی شاعری ناوداری کورد جگەرخوێن هەڵدەبژێرێت و دەیکاتە یەکەم گۆرانی خۆی بەناوی “شەڤ چوو”، خاوەنی چەندین ئاواز و گۆرانی هەمیشە زیندووە و یەكێک لە شاكارانە گۆرانی “ئای دلبەرێ”یە.
بە چەندین زمانی جیاواز گۆرانی گوتووە ئەرمەنی، كوردی “كرمانجی و زازاكی” عەرەبی، یۆنانی و سریانی)، 500 گۆرانی هەیە لەو ژمارەیە زیاتر لە 250 گۆرانییان كوردین.
بەناوبانگترین گۆرانییەکانی (هەی لۆلۆ دەلال، شەڤ چوو، ئای دلبەرێ، بلبلۆ، دیلان، تە ئەز كوشتم، خەملی زۆزان، ئەی وەلاتۆ، زەمان و یار، ژ بوونا تە ئەز دینم و چەندین گۆرانی و سترانی تر).
ئارام تیگران دۆستی كوردان و ڕێبەری گەلی كورد عەبدوڵا ئۆجالان بووە، گۆرانیەكیشی بۆ ستایشی ئاپۆ و گەریلادا وتووە، ڕێبەر ئۆجالانیش زۆر هۆگر و شەیدای گۆرانیەكانی ئارام بووە، لە یەكێ لە كتێبەكانیدا باسی سۆز و كاریگەری دەنگی ئەو هونەرمەندە ئەرمەنیەی كردووە، جەند جارێكیش لە نزیكەوە یەكیان بینیوە.
سەرچاوە: rojnews
