حسێن حوزنی موكریانی وەك هونەرمەندێك

لەدوای گەشتێكی فراوانم بۆ ناوچەكانی رەواندزو قەزای سۆران ودواتر شەقڵاوەو شاری هەولێرو  چوومە دیداری (د. كوردستان موكریانی) بەمەبەستی كۆكردنەوەی زانیاری پێویست لەسەر ئەو كەسایەتییەی كەمن وەك هوەرمەندێك دەمەوێت بیناسێنم وناوی (حسین حوزنی موكریانی)ە، ئەم كەسایەتییە جگە لەوەی (رۆژنامەنووس و شۆڕشگێڕو مێژوونووس و چیرۆك نووس و وەرگێڕ) كاری خۆی بەئەمەكانە جێبەجێكردووە، لەهەمانكاتدا دەكرێت وەك هونەرمەندێكی بەسەلیقەش ناوی بهێنین.
من لەو گەشتەمدا هیچ جۆرە سەرچاوەیەكم بەدەست نەكەوت كەسوودمەندم بكات بۆ بابەتەكەم، جگە لەبرای نوسەر (مومتاز حەیدەری) بەهەندێك لەئەرشیفەكەی خۆی هاوكاری كردم، مەبەستی من بەتەنها تیشك خستنە سەر ژیان و بەرهەمەكانی ئەو كەسایەتییە نییە بەشێوەیەكی گشتی، بەڵكو دەمەوێت بەشێوەیەكی تایبەت گرنگی بەو لایەنە بدەم كە كەمجار بۆتە وێردی سەر زمانی ئەوانەی گرنگیان بەلایەنی ژیانی (حسێن حوزنی موكریانی) داووە كەئەویش لایەنی هونەرییە.
حوسێن حوزنی موكریانی كێیە؟
 ناوی (حوسێن كوڕی سەید عەبد‌و لەتیف كوڕی شێخ ئیسماعیل كوڕی شێخ لەتیف)ی خەزاییە, گەلێك نازناوی بۆ خۆی داناووە لەوانە (حوزنی, داما‌و, خدۆك, بێژن)ی بەكارهێناووە. حسێن لە ساڵی 1890 لەگەڕەكی (حاجی حەسەن)ی شاری (سابڵاخ) لەدایك بووە. ئاشنایەتی لەگەڵ زمانەكانی كوردی‌و فارسی‌و عەرەبی هەبووە, لەتەمەنی (13) ساڵییەوە لە ماڵی باوكی دووركەوتۆتەوە‌و زۆربەی شارو شارۆچكەكانی كوردستانی گەورە گەڕاوە‌و بۆ هەریەك لەو شوێنانە بۆ ماوەیەك تیایدا ژیاوەو فێری كۆمەڵێك شتی نوێ بووە كە پێشتر بێئاگا بووە لێی لەوانە زانستەكانی ئاین‌و مێژو ‌و وێژەی كوردی‌و عەرەبی فارسی‌و توركی شارەزا بووە, هەروەها شارەزایی لە زمانەكانی (ر‌وسی‌و فەرەنسی) هەبووە. حسێن حوزنی موكریانی گەلێك پیشەی جیاوازی ئەنجامداووە لەوانە (چاپگەری, مۆر هەڵكەندن, خۆشنوسی, نوسین لەسەر مس‌و زەرد‌وشوشەو بەردی نرخدار, مۆری لاستیك, زەنگۆگراف, وێنەگری, كڵێشە هەڵكەندن), هەروەها جگە لەكوردستان (ر‌وسیا, توركیا, سوریە, ئەفغانستان, لوبنان, میسر, حیجاز, فەرەنسا) گەڕاوەو بۆ هەریەك لەو وڵاتانە فێری شتێك بووە‌و ئەو زانیارییانەی خستۆتە خزمەتی خەڵكی كوردستانەوە.  
  حوزنی لەدوای ئەوەی لەو تەمەنە كەمەوە ماڵی باوكی بەجێ دێڵێت‌و (خات سەلما)ی دایكی بۆ جاری دووەم مێرد دەكات‌و (گیوی موكریانی) دەبێتە دایك برای حوزنی, هەربۆیە لە منداڵییەوە حوزنی پەرەوازەی وڵاتان بووە, لە ئەستەمبوڵ فێری مۆرهەڵكەندن بووە,هەروەها لە بەیروت‌و شام‌و حەلەب‌و میسر‌و پاریس‌و حیجاز فێری بیری شارستانییەتی ئەو دەمە بووە‌و كە گەڕاوەتەوە كوردستان ئاواتە خواز بووە كە ئەو زانیارییانە بكاتە خواردنی عەقڵی كوردی بەڵام بەشێكی ئەو خەڵكە بە جاسوسی ئنگلیز ناویان هێناوەو زۆر جاریش بەرەو رووی زیندان‌و چەرمەسەری بۆتەوە تا ئەو رادەیەی مێشك نەخۆشەكانی ئەو دەمە كە بەنا‌و پێشڕەوایەتی خەڵكیان كردووە لە رووی كۆمەڵایەتی‌و ئاینییەوە بوونەتە هۆی زۆر كێشە بۆ حوزنی نیشتمان پەروەر.
حوزنی چۆتە هەر شوێنێك بیر‌و هۆشەكەی هەر لە كوردستان بووە, بۆ نموونە ئەو دەمەی كە دەچێتە حیجاز  بۆ كاری مۆر هەڵكەندن هێندەی پێناچێت ئەو تەقسەی ئەو وڵاتە هەراسانی دەكات چونكە ئەو تەقسە نییە كە ئەمی پێگۆشكراووە, هەربۆیە دەگەڕێتەوە كوردستان.
وەك لەسەرەتادا باسمكرد ئەوەی خەمخۆری دنیای ئەدەب بێت كەسایەتی حسێن حوزنی موكریانی وەك نوسەر‌و رۆژنامەوانێكی بەسەلیقە دەناسێت, بەڵام كەممان هەیە كە بەگرنگییەوە روانبێتمانە ئەو دنیایەی كە تایبەتە بەهونەری كڵێشەو فۆتۆگراف‌و زەنگۆگراف كە هەرگیز كارێكی ئاسایی نییە كەسێتییەكی كوردی لەو دەمەدا هێندە داهێنەربێت بە ئاستی رۆژنامە ناودارەكانی ئەو دەمە كاری  كردووە, گەر هەریەكێك بە گرنگییەوە بڕوانێتە رۆژنای (زاری كرمانجی) بۆی ئاشكرا دەبێت كە هونەرمەندێكی بەسەلیقە سەرپەرشتی كردووەو ئەو كڵێشە‌و وێنە جیاوازانەی تێدا نەخشاندووە, بلیمەتییەكەی حسێن حوزنی موكریانی تا ئەو ئاستە بووە توانیوێتی كتێبێكی تایبەت بە هونەری هەڵكۆڵین‌و فۆتۆگراف لە ساڵی 1934دا چاپ‌و بڵاوبكاتەوە لەژێر ناوی (وێنەگری‌و كۆڵین بە كردن‌و كۆشین‌و دیتن)  تا كەسێتی كوردیش وەك هەریەك لەو نەتەوانەیتر ئاشنایەتی ئەو هونەرەیان هەبێت كە لە زۆربەی وڵاتانی جیهاندا بڵاوبۆتەوە. گەر بەچاوێكی گەڕیدەییەوە بڕوانینە ئەو شێوازی كاركردنەی كە حسێن حوزنی موكریانی لە ژیانی كارە هونەرییەكانیدا پەیڕەوی كردووە هەستێكی زۆر سەرسامكارانەمان لەلا دروست دەبێت چونكە كەسێتییەكی وەكو حوزنی توانای هۆشمەندییەكەی ئەوەندە بێت كە چۆن بتوانێت رێژەیەكی زیاتر لە خوێنەوەران بەرەو دنیای ئەدەب‌و هونەر‌و دواتر نیشتمانپەروەرانە بەرێت ئەویش لەڕێگای ئەو كارە رۆژنامەگەرییانەی كە ئەنجامی دەدا, ئەو خاڵەی كە تائەمڕۆ بەشێوەیەكی شیا‌و‌و گونجا‌و باسی لێوەنەكراوە ئەوەیە كە حوزنی لە چئاستێكدا ئەو كارە هونەرییانەی ئەنجامداووە, ئێمە گەر بەووردی بڕوانینە ئەو (24) ژمارەیەی گۆڤاری زاری كرمانجی دەبینین هەر لەبەرگەوە تاكو ئەو كارانەی كە وەك لۆگۆ بۆ بەشە جیاوازەكانی  گۆڤارەكەی نەخشاندووە, هەروەها وێنەی كەسێتییەكانی ناو گەلی كورد بە دەست‌و پەنجە داهێنەرەكانی حوزنی كێشراوون.
كارەكانی حوزنی بەتەنها لەوەشدا خۆی نەگرتۆتەوە بەڵكو لەو سەردەمەی كە تەنانەت خوێندەواری زۆر كەم بووە ئەو لەو دەمەدا توانیوێتی كتێبێك بەناوی (وێنەگری‌و كۆڵین) چاپ‌و بڵاوبكاتەوە تاكو لە نێو گەلەكەی حوزنیشدا ئەو هونەرەی كە ناوی هونەری فۆتۆگراف‌و هەڵكۆڵینە بڵاوببێتەوە‌و پسپۆڕی تیادا وەربگیردرێت, حوزنی لە پێشەكی كتێبی (وێنەگری‌و كۆڵین)دا دەڵێت (مەبەستم لە نوسین‌و دانانی ئەم پەڕاوە لە وەختی گەڕان‌و سوڕانەوەم بە دیاری بیانیاندا وورد دەبوومەوە خۆمان‌و بیانیانم دەكەوتە بەرچا‌و, بەدبەختانەی خۆمانم لە صنعەت‌و فن پاش كەووتوو دەدی, پیشەی منیش چونكە مۆر هەڵكەندن بوو, لەسەر خۆمم بە پێویست زانی فنی كڵێشە كۆڵین بە رووناكی فێربم, بۆ ئەوە گەلێكم تەقەلادا‌و كۆششم كرد, یەكەمین جار لە ئەستەمبوڵ لەلای ئەڵمانەكان بەهۆی كوردەكانەوە رێگای قیل‌و فۆتۆلیتوگراف فێربووم, لە حیجاز‌و شام‌و حەلەب بەو جۆرە كارم دەكرد بەڵام ناتەواو بوو, لەچاپخانەی مارونیەی حەلەب لەلای مدیرەكەی كە سەلیم مەتەر ئەفەندی بوو كۆششم كرد, لە بەیر‌وت لەلای تاهیر تنیر‌و لە شام لەلای حناوی‌و لە میسر لەلای ورشە المصریە‌و لە پاریس خاوەندی دی پاریزیان لەم فەنەدا پیان گەیاندم منیش بەزانین‌و تاقیكردنەوە كردمە كتێب).

حسێن حوزنی موكریانی وەك هونەرمەندێك
من لەو بڕوایەدام جۆرەكانی كاری هونەری لەلای حسێن حوزنی موكریانی دەكرێت بەچەند بەشێك یاخود قۆناغێكەوە  كەبەم شێوەیەی خوارەوەیە:
1- مۆرهەڵكەندن: 
زۆر لەمێژە كرداری گواستنەوەی وێنەو هێماو پیتەكان لەڕوویەكەوە بۆ روویەكی تر بەكاردێت و لەو نێوەندەدا مۆرە لولەییەكان بەیەكەم جێبەجێ كردنێكی پراكتیكی بووبێت لەبواری گواستنەوەی هێڵ ووێنەو لەروویەكەوە بۆ سەر روویەكی تر، دیارە ئەو خولیایە بووە هۆی ئەوەی كە ئەزموونێك بێتە پێشەوەو ئەو وێنەو نوسراوانەی كەجێگەی مەبەستە بەبێ هیچ گۆڕانێك بگوازرێتەوەو تەختەش یەكێك بووە لەو كەرەسە خاوانانەی كەمرۆڤ كاری پێكردووە، دیارە ئەو مێژوو گرنگییە بۆتە هۆكار بۆ ئەوەی كەحسێن حوزنی موكریانی هەوڵی ئاشنابوون بەهونەری مۆرهەڵكەندن لەلای ئەڵمانەكان بدات و پاشان كاركردنی لەسەر ئەو ئاشنابوونە لەچەند وڵاتێكی جیاوازی وەكو (سوریا، لوبنان، حیجاز) درێژەی پێداووە بەتایبەت لەحیجازدا بۆ ماوەیەك ئەو كارەی ئەنجام  كردووە، بەڵام نەگونجانی لەگەڵ ئەو كەشە پەیڕەو كراوەی ئەو وڵاتە هۆكاربووە بۆ ئەوەی بگەڕێتەوە بۆ كوردستان.
ئێمە گەر بەشێوەیەكی هونەرییانە بڕوانینە ئەو كارە هونەرییانەی كەحسێن حوزنی بۆ بەرگی كتێبەكانی (تاریخ كردستان، خونچەی بەهارستان)و بەرگی گۆڤاری زاری  كرمانجی نەخشاندووە بەئاسانی هەست بەنزیكییەك دەكەین لەنێوان ئەو كارانەو ئەو هێڵانەی كە لەكاری مۆرهەڵكەندندا دەبینرێت كەئەوەش نموونەیەكە بۆ ئاشنابوون و  بەسەلیقەیی حوزنی لەهەردوو بوارەكەدا هەرچەندە شێوازەكانی مۆرهەڵكەندن .
2- چاپگەری، وێنەگری، كڵێشەی هەڵكەندن:
لەگەڵ ئەوەی چاپگەری چەندین شێوازو قۆناغی جاوازی تێپەڕاندووە، بەڵام هیچ یەكێك لەو قۆناغ و شێوازانە وێنەی كەسێكی وەك حسێن حوزنی تێدانەبووە كەفەرهادانە كاری بۆ  چاپ و چاپخانە كردبێت و لەیەك كاتدا بۆخۆی نوسەرو وەرگێڕو چاپگەرو كۆكەرەوەو دابەشكەری گۆڤارەكە بووەو هەرخۆشی ئەو كارە هونەرییانەی ئەنجام داووە كەئەمڕۆ باسی لێوە دەكەم، 
حسێن حوزنی موكریانی زۆر بەسەلیقانەوە سەرنجە وردەكانی كاری چاپگەری فێربووە لەچاپخانەكانی (مارونیە)ی شاری حەلەب و شاری بەیروت،لەلای تاهیر تنیر ، و لەشام لەلای حناوی لەمیسرو لەلای (ورشە المصریە)و لەشاری پاریس لەلای (دی پاریز یان)،  
وەك فۆتۆگرافیش زۆر بەدڵنیاییەوە كتێبی (وێنەگەری و كۆڵین بەكردن و كۆشین و دیتن) باشترین نموونە بێت بۆ ئەوە ئاشنابوون و بەسەلیقەییەی كە حسین حوزنی لەبواری هونەری فۆتۆگرافیدا هەیبووە، تەنانەت بۆ هەرهەنگاوێك جگە لەزانیاری لەسەر هەنگاوەكانی فێربوون بەوێنە بیری وێنەری هێندەی رۆشنكردۆتەوە.
3- زەنگۆگرافی:
هونەری زەنگۆگرافی یەكێكە لەو كارە هونەرییانەی كەهونەرمەندە گرافیكەكان ئەنجامی دەدەن واتا هەڵكەندن لەسەر مس و زینگ بەتایبەتی لەسەر زینگ و باشرین ترش بۆ كاركردن بۆ ئەو كارە ترشی (نیتریك)ە و ئەو ئەزموونە لەلای حوزنی زۆر هونەرییانە مامەڵەی لەگەڵدا كردووە ئەوەتا لەلاپەڕە (61)ی كتێبی (وێنەگری و كۆڵین بەكردن و كۆشین و دیتن) دا بەم شێوەیە باس لەچۆنێتی ئەو كارە دەكات :
ئەسید نتریك 2 سانتیمەتر، ئاوی دوبارە 100 سانتیمەتر لەدوای ئەوە كە بەهەور  تواوەی لێدە درێت بەتیرۆك كراسێكی تەنكی مركب لەڕوەكەی دەدرێت  بڕوانینە وێنەی ژمارە 18ی لاپەڕەی 62ی كتێبی (وێنەگری و كۆڵین بەكردن و كۆشین و دیتن) ئەوە لەیەك كاتدا دوو لایەنی داهێنەرانەو بەسەلیقەیی ئەم كەسایەتییە هونەرمەندەمان بۆ بەدەردەكەوێت كەچەندە شارەزابووە لەو بوارەدا بەنەزەری و پراكتیكی لەهەمانكاتدا .
لایەنێكی تری بوونی هەستی هونەرییانە لەلای حوزنی ئەوە بووە لەگەڵ هەر كارێكدا نیشانەیەك یاخود ناوێكی بەكارهێناووە كەئەوەش سیمایەكی هونەرییانەی جیهانییە كەهونەرمەندە ناودارەكانی جیهان پەیڕەیان كردووە بۆ ئەو مەبەستە گەر بڕوانینە وێنەكانی (عومەر ئاغای خەزێنەداری ئەورەحمان پاشا) و وێنەی (سەركردەیەكی ئەورەحمان پاشا سەركۆماری جاف) هەست بەبوونی ناوێك دەكەین كەئەویش ناوی (زاری كرمانجی) یاخود (زاری كرمانجی- رەواندز) دەكەین كەئەوەش نیشانەی بەئاگایی ئەو نیشان دەدا لەو روەوە.
ئاشنابوونی حسێن حوزنی موكریانی بەهونەری زەنگۆگرافی بۆ ئەو سەردەمانە دەگەڕێتەوە كەوەك گەڕیدەیەك شاروشار، وڵات و وڵات گەڕاوەو فێری ئەو  هونەرە بووە، كاتێكیش گەڕاوەتەوە كوردستان و چاپخانەی زاری كرمانجی هێناوەتەوە رەواندز هەموو ئەو زانیارییانەی كردۆتە پراكتیك و لەچاپكردنی كتێب و گۆڤاری (زاری كرمانجی) دا رەنگی داوەتەوە، 
4- خۆشنووسی و لۆگۆ:
گەر بڕوانینە سەرجەم لاپەڕەكانی گۆڤاری زاری كرمانجی هەست بەوە دەكەین كەهونەرمەندێك سەرپەرشتیاری كاری هونەری گۆڤارەكەی لەئەستۆگرتووەو لەناسنامەی گۆڤارەكەدا نوسراوە گۆڤارێكی ئیجتماعی تاریخی فنی ئەدەبی كوردییەو مانگی جارێك دەردەچێت لەوانە:
بوونی لۆگۆ بۆ هەموو ئەو ستون و بابەتە جیاوازانەی كە حسێن حوزنی موكریانی  مەبەستی بووە وەك بەشێكی سەربەخۆ بناسرێت و خوێنەران هەست بەگۆڕانێك بكەن لەو دنیایەی كەناوی دنیای رۆژنامەوانییە لەوانە (چیرۆك، خۆشنووسی، هەموو لایەك، دەردی دەروون، مزگێنی، وەڵامی زاری كرمانجی، رزگاری لەنەزانین) كەدەكرێت لێرەدا چەند نموونەیەكی ببینین،  لەهەمانكاتدا لایەنی خۆشنووسی بەهەند وەرگرتووەو لەزۆربەی مانشێتی ناو گۆڤارو ئەو كتێبانەی كەچاپی كردوون هەست بەگەشانەوەیی ئەو لایەنە دەكەیت.
5- كتێبی  وێنەگری و كۆڵین بەكردن و كۆشین و دیتن:
 لایەنێكی تری بەسەلیقەیی هونەرییانەی حوزنی چاپكردنی ئەو كتێبەیە كەتیایدا زەنگۆگرافی بەزانین و تاقیكردنەوە وێنەكولان بەتیشكی رووناكی لەساڵی 1934دا بەچاپگەیاندووە كەتیایدا حوزنی بەشێوەیەكی پراكتیكی كەسێتی كورد فێری ئەو هونەرە دەكات كەبۆ ئەو سەردەمە كارێكی بێوێنەبووە كەچیتر كەسێتی كوردیش  هێندەی ترلەو پێشكەوتنەی دنیا بەدوور نەبێت.
حوزنی لەپێشەكی كتێبی ( وێنەگری و كۆڵین بەكردن و كۆشین و دیتن)دا دەڵێت (هەركەسێك دەست بەوێنەكۆڵین بكا دەبێ زۆر چاك فۆتۆگراف بزانێت، چونكە كولانی بەتیشك و وێنەگەری- فۆتۆگرافی زادەیەكن) گەر بەوودییەوە بڕوانینە ئەم پێناسەیە ئەوەمان بۆ دەسەلمێنێت كە حسێن حوزنی لەبواری (فۆتۆگراف)یشدا شارەزا بووە بۆیە توانیووێتی ئەو كارە پێكەوە ئەنجام بدات و لەكارە رۆژنامەوانییەكەیدا رەنگ بداتەوەو كاری بۆ بكات، ئێمە گەر بەتەنها كتێبی (وێنەگری و كۆڵین بەكردن و كۆشین و دیتن)و ژمارەكانی گۆڤاری (زاری كرمانجی) بەهەند وەربگرین بەدڵنیایی بەسەلیقەیی هونەرییانەی (حسێن حوزنی موكریانی) مان بۆ ئاشكرا دەبێت كەچەندە هونەرمەندانە كاری كردووە.
 نوسەر‌و گەڕیدە‌و لێپرسراوی ئنگلیز (هاملتۆن) لەسەردەمی گۆڤاری (زاری كرمانجی) دا بۆ ماوەیەك رێی دەكەوێتە رەواندز‌و بەدیداری حوزنی موكریانی شاد دەبێت بە هێمنییەوە دەڕوانێتە رەنجی فەرهادانەی حوزنی‌و رەوتی رۆژنامەنوسی كوردی, لە چەند شوێنێكی كتێبە مێژوویەكەیدا كە بە زمانی ئنگلیزی بڵاوراوەتەوە بە ناونیشانی (roda through kurdstan) لە چاپە ئنگلیزییەكەیدا لە ساڵی 1958 دا سەبارەت بە حوزنی نوسیوێتی (سەید حسیًن حوزنی لە رەواندز دەژی‌و خاوەنی رۆژنامەیەكی كوردییە, بە تەنیا هەموو بابەتەكانی دەنوسێ, بە دەستی خۆی وێنەكانی دەكێشان, بە تەنیا چاپی دەكردن, لە دوایدا خۆیشی دەیپێچایەوە كە ئەمەش نموونەیەكی تەواوی دەگمەنە لەسەر رووی زەوی, ئەم رۆژنامەنووسە ئارەزووی نیشاندا كە هاوڕێی گەشتەكەمان بێ, بەڵام وەك هەموو رۆژنامەنووسێكی جیهانی نەیدەویست كە ئەو هەلە لەكیس بدات‌و دەفتەرێكی لەگەڵ خۆی هێنا تا ئەو شتانەی كە دەیان بینی تۆماریان بكات).
ئەمەش گەشەسەندووێتی بواری رۆژنامەوانیی بووە لەلای حوزنی موكریانی بەڵام بەداخەوە لەدوای ئەوەی كە مەلاكانی رەواندز حوزنی موكریانی  تەنگەتاو دەكەن‌و دەیدەنە دادگا ئەم كردەوەیە حوزنی زۆر دڵگران دەكات, هەرچەندە دواتر هەر ئەو مەلایانە دێنەوە لای حوزنی‌و داوای لێبوردن لێدەكەن, بەڵام ئەوە نابێتە چارەسەرو بەو غەمەوە لە رۆژی 18/11/1943 روودەكاتە شاری بەغدا‌و  ئەمە كاری كردە سەر تەندر‌وستی لەش‌و هۆشی‌و لە 20/9/1947 بۆ دواجار چاوەكانی لێكدەنێت.
من دەمەوێت لەكۆتایی ئەم بابەتەمدا سەرنجتان بۆ خاڵێك رابكێشم كەئەویش لایەنی گرافیكە، لەساڵی 1963دا هونەری گرافیك لەعێراقدا خوێندراوەو لەسەردەستی هونەرمەندێكی پۆڵندی بەناوی (ئارتۆ)و یەكەمین هونەرمەندی كوردیش كەپیشانگەی گرافیكی كردبێتەوە هونەرمەند (عەلی جۆڵا) لەساڵی 1964دا بووە، گەربڕوانینە ئەو ساڵانە بۆ مان ئاشكرا دەبێت كەچەندە حسێن حوزنی موكریانی چەندە لەپێش سەردەمەكەی خۆیەوە بووە چونكەحوزنی لەساڵی 1934 دا كتێبی (وێنەگەری و كۆڵین) ی چاپ و بڵاوكردۆتەوە.  
ئەمە تەنها بەسەركرنەوەیەكی سەرپێییانەی كارو بەرهەمەكانی ئەو هونەرمەندەیە كەناوی (حسێن حوزنی موكریانی)ە.
هیوادارم توانیبێتم بەشێكی بچووكی ئەو بوارە هونەریەی حسێن حوزنی موكریانیم بەدەرخستبێت كەجێگەی شیاوی خۆیەتی گەورەتری بۆ ئەنجام بدرێت.

سەرچاوەكان:
1-گۆڤاری زاری كرمانجی.
2-كتێبی وێنەگری‌و كۆڵین چاپی 1934.
3-بڵاوكراوەی  رۆڤار ژمارە (19) كە تایبەتە بەحسێن حوزنی موكریانی. 
4-گۆڤاری هەولێر ژمارەكانی (1-2)ی ساڵی 1998.
5-پاشكۆی رۆژنامەی(العراق) ژمارە (32)ی ساڵی 1979.
6-رۆژنامەی كوردستانی نوێ ژمارە(1303)ی ساڵی 1996 بەڵگەی زیندوو عومەر بەرزنجی.
7- گرافیك هونەری شارەزایی   وەرگێڕانی كاروان ئەنوەر ساڵی 2000.

بەختیار سەعید
Apr 12, 2022

سەرچاوە: galawej