بە خوشکەکەم ئەڵێم: بۆ نێوی کوردیت بۆ منداڵەکەت هەڵنەبژاردووە؟ ئەڵێ: خۆ کوردبوون بەوە نییە!
بە کچەپوورەکەم دەڵێم: بۆ بە کوردی نانووسی؟
دەڵێ: خۆ کوردی نووسین نابێتە کوردایەتی!
بە هاوڕێیەکم دەڵێم: بۆ هیچ هەڵوێستێکت نییە سەبارەت بە کێشەکانی گەلی کورد؟
دەڵێ: کوردایەتی لە دڵمدایە نامهەوێت بیهێنمە سەر زمان و خۆم تووشی کێشە بکەم. گرینگ دڵە!!
بە شۆفیری تاکسی دەڵێم: بۆ گۆرانی کوردی دانانێی؟
دەڵێ: مووسیقا سنوور ناناسێ!
بە دووکاندار دەڵێم بۆ نێوی دووکانەکەت بە کوردی نانووسی؟
دەڵێ: بێکاری برا... من خۆمم بۆ بەخێو ناکرێ.
بە کوڕێکی گەنج ئەڵێم: بۆ جلی کوردی لەبەرناکەی؟
ئەڵێ: دۆستەکەم پێی جوان نییە و گاڵتەم پێ‌دەکا. خۆ کوردبوون تەنیا بە جلی کوردی نییە!!
بە کچێکی هاوڕێم لە تۆڕە کۆمەڵایەتێکان دەڵێم مێژووی کوردستان دەزانی؟
دەڵێ: من نازانم دوێنێ چیم خواردەوە تۆ باسی چ دەکەی؟! لەزگەی پێکەنینیش دەنێرێت!
لەوەی دەترسم ڕۆژێک باسی مێژووی کوردستان و مافی کورد و گرینگی زمان و نەریتی کوردی، لە لای هاوسەرەکەم بکەم؛ پێم بڵێ: "ئەوە قسەی چی دەکەی"!!
بۆ ڕزگاربوون و سەرکەوتن؛ پلەپلە سەر دەکەوین.
بۆ دیل بوون و دۆڕانیش؛ پلەپلە دادەکەوین!
نووسەر: چاوەڕوان
