لەوەتەی خۆتان ناسیووە، تەنها لە قیڕە قیڕ و هاتوهاواری بڕۆخێ و دەیڕووخێنین، ئازان. ئەوی دروستکردن و بنیادنان وەک جندۆکەی بیسمیللا لێکراو، توخنی ناکەون.
ئەرێ لە ڕووخاندن و سووتاندن و تەفروتوناکردن ماندوو نەبوون؟! لەو هەموو شەڕەبەرد و شەڕەجوێن و شەڕەپەڕۆ و شەڕەفەیسبووکە بێزار نەبوون؟!
هەرگیز بۆ ساتێکیش، بیرتان لە داگیرساندنی چرایەک، چاککردنەوی شکاوییەک، کردنەوەی پەنجەرەیەک کردۆتەوە؟
هەر یەکە و چاویلەکەیەکی ڕەشتان لە چاو کردووە، دنیاتان لە خۆتان کردووە بە چەرمە چۆلەکە!
ئەمە چۆن بیرکردنەوە و چتۆ تێڕوانینيکە؟!
لای ئێوە ئاسمان ڕەشماڵێکی قورقوشمینە بۆ دەرمانیش تروسکەیەک ڕووناکی تێدا نییە
خەڵک هەموو دز و گەندەڵ و مافیان، تەنها ئيوە چەوساوە و مافخوراو و ماڵوێرانن
وەک زەڕنەقوتە زارتان بۆ مووچە و دەرماڵە داچەقاندووە، بەڵام ئامادە نین دەقیقەیەک بە دڵسۆزی کار بکەن.
ئەهلی مزگەوت و نوێژ و ڕۆژوون، کەچی بە دیتنی قژ، یان لاقی ڕووتی ژنێک، دەبێ ڕاسپۆتین ئاوتان بە دەستتدا بکات!
خۆتان بە پێشکەوتنخواز و دیموکرات دەزانن، کەچی لەسەر کورتەنامەیەک، خوشکەکانتان دەکوژن!
لافی گۆڕین و دامەزراندنی دەوڵەتی دیموکرات و سیکۆلار و پێشکەوتووی بە قانوون و یەکسانی دەکەن، بەڵام هەمیشە دوای سیاسەتمەداری کاڵفام، دز، کوردکوژ، شارپەرست، ئابڕووتکاو دەکەون. ئیدی هەروا قوتەی مل نێرکە کاردووە بە چەپڵە و حاڵلێهاتنی دەروێشانەی ئيوەگەل دەبێتە ڕێبەری گەل و قارەمانی نەتەوەیی! دواتر کە سەرتان لە بەردی ئەلحەد دەدا و دەستان لە بنی هەمبانەی بەتاڵەوە دەردەچێ، لەبریتی بێداربوونەوە و ڕەخنەلەخۆگرتن، سەرلەنوێ هەڵپەی دۆزینەوەی شاسوارێکی ئەسپەدارینەتانە!
زانکۆ! تان تەواو کردووە، ئەمما فڕتان بە دنیاوە نییە. لە کادێن نووستون و خەونی سوڵتانانە دەبینن
کوردستانتان بەلاوە گڵاوە، بەڵام بۆ شوردنی ئاودەستی ئەوروپاییەکان، خۆتان بە شەقی پۆلیسی تورک و پۆڵەندی و مەترسیی شەپۆلانی زەریای ئیجە و مانشدا دەدەن.
کوردستانەکەتان پڕە لە ئەندازیار و بازرگان و کرێکاری تورک و ئێرانی و لوبنانی کوێ و کوێی، کەچی جەنابت بێکار و بێبار جادە دەپێوی!
گلەیی لە گەندەڵ و دزان دەکەیت، بەڵام لە ماستاو ساردکردنەوە و شانتەکاندندا وەستای وەستایانیت.
فەرموو بیڕووخێنن، بەڵام بزانم کوا جێگرەوە؟
ئەدی خۆتان چی؟ کوا نەخشە و پلانی داهێنانەتان؟
کوا سەرکردەی ڕاست و پاکتان؟ کوا ڕێکخراوی دڵسۆز و تۆکمەتان؟!
کوا خەونی دواڕۆژتان؟
کوا بیرکردنەوەی ورد و پلانی تۆکمەتان؟
ئێوە قارەمانی دەمشڕی و جوێنفرۆشانی فەیسبووک و تیک تووک و سناپچاتن
شێرە بەفرینەن و بەرگەی تاوێک خۆرەتاو ناگرن
گۆڕەکەت پڕ لە نووربێ مامە شێخ ڕەزا ...
ئامانج شاکەلی
2021/12/21
سەرچاوە: kurdistan24
ئەم وتارە بۆچوونی نووسەرە.
