بێکەس بەرواری
وەک دھێتە زانین ئەڤ ساڵە د دەستپێکا هەیڤا 8 ی 2024 ێ دا و دبیرەوەری یا کارەساتا شەنگالێ وکۆمەڵکۆژی یا کو ل 2014.8.3 ێ دژی کوردستانیێن ئێزدی ھاتی یە ئەنجامدان وەک تەمامکەرەک ژ زێدەتر ژ 74 فەرمانێن جینوسایدکرن و ژناڤبرن و بزوری بوسڵمان کرنا کوردێن ئێزدی ، گەلەک پەیام وگوتن ھاتنە بەڵاڤکرن ژلایێ چین و تەخێن جودا جودایێن جڤاکێ کوردستانی و عێراقی و جیھانی ڤە .
لێ گوتنێن ھەرە کارتێکەر و بەربەڵاڤ گوتنێن قاسم شەشۆ ی بون . قاسم شەشو ئێک ژ دیدەڤانێن بۆیەرێن کومەڵکۆژیێن دژی ئێزدی یا ھاتینە ئەنجام دانە و ئێک ژ فەرماندارێن سەربازی یێت پارتی دیموکراتی کوردستان ل وان دەڤەرێن ئێزدی نشین و دوان سەردەمان دا ئەوێن هۆڤاتئڤو کۆمەڵکوژیەک کێم نمونە بەرامبەری کوردێن ئێزدی ژلایێ ڕێکخراو دەولەتا ئیسلامی ل عیراق و شامێ یا تیرورستی یا بەرنیاس ب داعش و بهاریکاریا داگیرکەرێن کوردستانی ئەنجام داین .
قاسم شەشو دگوتنێن خوەدا موحەمەدێ پەیامبەرێ موسڵمانان و ھزرێن ئاینی یێن توندڕەو یێن موسڵمانێن توندڕەو دکەتە ئەگەرا کۆمەڵکوژیێن دژی ئێزدی یا ، هەر ژدەست پێکا دیروکێ و تاکۆ کۆمەڵکوژیێن ساڵا 2014 ێ هاتینە ئەنجام دان و ددەتە دیارکرن کو هندی ئەو هزرێن توندڕەو هەبن دێ هەر کۆمەڵکوژی دژی ئێزدی یا هەبن .
ئەڤ گوتنە بڕەنگەک وەسا هاتنە بەڵاڤکرن کو وەک بێڕێزی یەک بەرامبەری موحمەدێ پەیامبەر و ئاینێ ئیسلامێ وبریندارکرنا هەستێن موسڵمانان هاتە هەژمارتن.
وەک دەرئەنجامەک وکارڤەدانەک گەلەک بەرفرهە هەبوو و هێرشێن هەمە لایەنە بو سەر قاسم شەشۆ و ئو ئێزدی یا هەبوو و هەیە و تاکۆ ڕادەیەکا گەلەک توند و ڕادیکال و بسەدان پەیامێن توندڕەوی و ڕەگەز و ئاین پەرستی یەکا هشک و شاش ڤەگوهاستنا گوتنێن قاسم شەشۆی و پەیامێن دژی ئێزدی یا هاتنە بەڵاڤکرن .
تشتێ گەلەک سەیر گەلەک کەسان نە گوتنێن قاسم شەشویی نەدیتینە ونە گوهلێ بوونە و نەخواندینە .
باشە قاسم شەشۆ ب چەند گوتنەکا دلێ گەلەک کەسێن موسڵمان بریندارکر !! ب تایبەت ئەوێن ب دروست گوهداری یا گوتنێ وی نەکری و پتنێ گوهلێ بووی ژ کەسێن دی ، کو قاسم شەشۆیی بێڕێزی یا ب پیرۆزیێن موسڵمانان و پەیەمبەرێ موسڵمانا کری ،ئەوان کەسان کارڤەدانێن گەلەک توندڕەو بەڵاڤکرینە و گەف و نفرین ل هەمی ئێزدی و شەنگالی یا کرن و دکەن و ب دەهان مەڵاو و ڕێبەرێن ئاینی هێرش و هەرەشەیێن توند کرنە سەر قاسم شەشۆی و ئێزدی یا .
باشە ژلایەکی ڤە دیارە کو ئەڤە بابەتەک پیلانکری یە و بەرنامە ڕێژی یەک بۆ ڕەوایی دان ب هێرش و کوشتارێن دژی ئێزدی و شەنگالی یان ژلایەکی ڤە و ژلایێ دی ڤە ئاشکرا کرنا هەلگرێن پەیامێن توندڕەو و ئەو موسڵمانێن خوە ل پشت پەردەیا موسڵمانەتیێ ڤەشارتی و هەلگرێن ئەجندایێن سیاسی و ئیسلاما سیاسی یا توندڕەو و ئیخوانی نە ، یان ژی شانەیێن داعش یێت نڤستینە . و دەستەک و پیلان سازی یەکا فرەلایەنەیە ژبوو دروستبوونا دووبەرەکیێ دناڤ جڤاکی کوردستانی دا و بتایبەت تر دناڤبەرا کوردێن ئێزدی و کوردێن موسڵمان دا .
باشە پا ھەکە مروڤ ھزرێن خوە بکەت کانێ وان 75 فەرمان و دەھان کۆمەڵکوژیێن دژی ئێزیدی یا ھاتینە کرن و ئەو هەمی زۆڵم و زۆرداری یا بەرامبەری ئێزدی یا هاتی یە ئەنجام دان ژ کوشتن وگرتن و ئاوارە و دەربەدەرکرن و تەعداریێن سیکسی و کڕین و فرۆتنا کچ و زاڕوکێن ئێزدی و بێ دادی یا سەدان ساڵا و ل ژێر ناڤێ ئیسلامێ و ب دەستێ موسڵمانان هاتینە ئەنجام دان چەند ھەست و دلێ ئێزدی یا بریندارکری یە. چ جورە وێنەیێ مرۆڤێ موسڵمان دناڤ هزر و مەشی و بیردانکا ئێزدی یا دا دروست بوویە و کانێ ئەو چەند هەست ب زوڵم و زوری و بێ دادیێ دکەن ؟؟
کێ ئەو فەرمان و کۆمەڵکوژی ئەنجام دانە ؟؟
بەرپرسایەتی یا وان ھەمی تاوانا وئەنجامدەرێن وان دکەڤیتە ملێ کێ ؟
چاوا ئەم وەل مرۆڤ و وەک کوردستانی دێ شێین وێ زوڵم و زوریێ ل سەر خویشک و برایێن خوە یێن کوردێن ئێزدی ڕاوەستینین ؟
چاوا دێ شێین برینێن وان دەرمانکەین و تۆڤێ پێکڤە ژیانێ چینین و بەرهەم ئینین ؟
کوردێن ئێزدی و موسڵمان و ھەستێن نەتەوەی ومرۆڤ دۆستیێ یێت تێکەل کرین لگەل هەستێن ئاینی و بمخابنیڤە توندڕەوی یەک و دوبەرەکیەک یان دروست بوویی و خوشکەرێن ئاگرێ ڤێ دوبەرەکیێ دزۆرن .
چونکی بڕاستی نوکە دناڤ جڤاکا کوردستانی دا پێکڤە ژیان یا د مەترسیێ دا . مخابن بو ڤی ئاستێ نزمێ کەسێن جڤاکێ ، گەڤ و هەرەشەیێن ژناڤبرنێ و نفرینا ل ھەڤوەڵاتی و ھەڤ نەتەوێ خو دکەن ، پتنێ ژبەر ئەگەرێن ئاینێن جودا .مخابن دیارە ھزرا داعشا بکویراتی جھێ خوەیێ کری و شانەیێن وان یێ دکەفتینە لڤینێ .
دڤێت هەمی کوردستانی ئێدی باشتر دهشیاربن و بژیری سەرەدەریێ لگەل ڤان ڕویدانا بکەن .
نابیت شاشی یا کەسەکی یان گروپەکی ب ھەڕەمەکی بھێتە گشتگیرکرن ، دا نەبیتە ئەگەرا داڕمانا شیراز و پێکھاتەیێن جڤاکێ .
ھزرێن خوە بکەن بەری ھەر تشتی ئەم مرۆڤین و پاشی دابەش دبین ل سەر نەتەوە و ئاین و گروپێن ئەتنیکی وئایدیۆلۆژی . لەوما بەری ھەری تشتی وەک مرۆڤەک ھزر بکە.گەڕھان ل ڕاستیێ ئەرکێ ھەمی مرۆڤێن ھزرکەرە ، بەڵاڤکرنا ژەھرا دوبەرەکیێ ئەگەرا ئالۆزکرنا پێکڤە ژیانێ یە.
پێویستە دیالوگەگ نیشتیمانی و نەتەوەیی وئاینی دناڤنەرا پێکهاتەیێن جڤاکێ بهێتە ئەنجام دان و بتایبەت دناڤبەرا کوردێن ئيزدی وکوردێن موسڵمان دا . ل سەر نگەهێ کوردستانی هەمی یەک جڤاکن ، بهەمی ئول وئاین و ڕەنگ و ئایدیۆلوژیەتان ڤە. پێکڤە ژیان و هەڤدوو پەژراندن پێوستیەکا گرنگ و دیروکی یە ، لەوما دڤێت هەر کەس و گروپ و کەسێن هزرڤان و کەسێن ئاینی بەرپرسایەتی و ڕۆڵێ خوە دئارامکرن و تێگەهاندن و هوشیارکرنا تاکێن جڤاکێ ببینن و توڤێ دوبەرەکیێ کێم کەن و توڤێ پێکڤە ژیانێ و هەڤدوو قەبولکرن بچینین ، سیتراتیجیەتەک هەڤبەش یا نەتەوەی و نیشتیمانی ژبوو گەل و وەڵاتی و پێشەڕۆژەکا باشتر و گەشتر دروست بکەین و بەرهەم بینین .
