بارزان شێخ عوسمان
گەلی کورد لە هەمو بەشەکانی کوردستان کە هەریەکەیان لێکێنراون بە دەوڵەتەکانی (عێراق ،ئێران ،تورکیا و سوریا)ەوە، یاد و بۆنەی شادیی و خۆشیی و کۆڕ و کۆبونەوەی ناخۆشیی و تراژیدیاکانی هەیە .
ئەگەر لە کوردستانی تورکیا و ئێراندا کورد دەرفەتی بەڕێوەبردنی ئەو یادکردنەوە تاڵ و شیرینانەیان نەبێت بە ئاشکرا ،ئەوا لە کوردستانی عێراق و سوریا و وڵاتانی ئەوروپا و ئەمریکا و کەنەدا بە ئازادیی دەتوانن گوزارشتی خۆیان دەرببڕن ،چ بە ئاهەنگ و سرود و گۆرانیی وەك نەورۆز و دامەزراندنی کۆماری کوردستان و ، راپەڕینی گەلی کوردستانی ئێران لەگەڵ گەلانی ئێران و ، راپەڕینی ئاداری ١٩٩١ ی کوردستانی عێراق ،یاخود کۆڕ و مەراسیمی ماتەمینیی وەك شکستی کۆماری کوردستان و لەسێدارەدانی پێشەوا قازی محمد و هاوڕێکانی ، شکستی شۆڕشەکانی شێخ عوبێدوڵای نەهری و شێخ سەعیدی پیران لە کوردستانی تورکیا ، کارەساتەکانی بۆردومانکردنی دۆڵی جافەتیی و بالیسان و هەڵەبجە بە چەکی کیمیایی ، شاڵاوەکانی ئەنفال ، کۆڕەوی چەند ملیۆنیی کوردستانی عێراق ، کارەساتی خوێناوی قامیشلوو لە ئاداری ٢٠٠٤ و جینۆسایدی کوردانی ئێزدیی لە ئۆگەسەتی ٢٠١٤ و کارەساتەکانی تر کە ئەوانە هەمویان مۆرکێکی نەتەوەییان هەیە بونەتە خەم یا جەژن و خۆشیی ،تاڵ و شیرینی نەتەوەیی و موڵکی هەمو کورد لە هەر بەشێکی کوردستان .
دیارە وا پێویست دەکات لەو مەراسیمانەدا ئاڵای کوردستان بشەکێتەوە و هەڵبکرێت . بەڵام ئەوەی تێبینیم کردوە بە هۆی رەفتاری حزبێکەوە زۆربەی ئەو کۆبونەوانە مۆرکە نەتەوەییەکانیان لەدەست دەدەن و مۆرکێکی حزبیی لە خۆ دەگرن .
زۆر ئاسایییە ئەگەر ئەو رێوڕەسم و ئاهەنگ و کۆڕی ماتەمینییانە لە بارەگای حزبێك بەڕێوە بچن یا حزبێك بانگەشەی بۆ کردبێت و رێکی خستبێت لۆگۆ و ئاڵای خۆی هەڵبکات و دایبنێت ، بەڵام ئەوە ئاسایی نییە کە کۆمەڵێك رێکخراو و پارتی سیاسیی بە هاوبەشیی رێکی بخەن کەچی تەنیا لۆگۆی حزبێك زاڵ بکرێت و بسەپێنرێت .ئەوکاتە هەم موناسەبەکە دەکاتە موڵکی خۆی بە تەنیا ،هەم بەها و مانا نەتەوەیی و نیشتمانییەکەی ئەو جەژن و یاد و بۆنەیە یا کۆڕی ماتەمینییە لەدەست دەرێت .
ئەوەی تێبینیم کردوە (بە تایبەتیی لە هەندەران ) لەزۆربەی ئەو ئاهەنگ و کۆبونەوو ماتەمینانەدا کە حزبیی نین و نەتەوەیی و نیشتمانیین حزبێك خۆی دەکاتە تاکە نوێنەری کورد لەهەرجێگەیەك بن و دەبێتە خاوەنی مەسەلەکە و تاکڕەوییانە هەڵس وکەوت دەکات رێگە نادات لە لۆگۆی حزبەکەی و ئاڵایەکی تر کە خۆی ناوی ناوە ئاڵای کوردستان ،هیچی تر دابنرێت و هەڵ بکرێت .
بیانوی ئەو تاقمە ئەوە نییە کە ئاڵاکەی ئێستای کوردستان هەڵەی تیایە یا سەرنج و تێبینیی لەسەر هەیە ،بەڵکو ئەوان مەرامیان لەوەدا مۆڵی خواردوە کە لە سەرۆکی خۆیان ،لە حزبی خۆیان ، لە ئایدۆلۆژیای خۆیان ،لە بیرکردنەوەی خۆیان ،لە ئاڵا و لۆگۆی خۆیان زیاتر ،دان نانێن بەوانی تردا .
بە جۆرێکیش خۆسەپاندنەکەیان بۆ چوەتە سەر کە هەرکەس بە پێچەوانەوە لەسەریان بدوێت بە خایین و نۆکەری ناوزەد دەکەن .
بە داخەوە بە هۆی هەڵە و سیاسەتی چەوت و گەندەڵییە زۆر و زەوەندەکانی دەسەڵاتی سیاسیی لە کوردستانی عێراق ، ئەو تاکڕەوییە بە جۆرێك سەپێنراوە کە ئێستا لە هەمو بۆنەیەکی خۆش یا یادکردنەوەی تراژیدیایەك لۆگۆی تاکە حزبێك دەبینرێت بە تایبەتیی لە هەندەران ، مەسەلەکەش خەریکە زۆر ئاسایی دەبێت بە بیانوی ئەوەی کە جیاوازیی نییە هەمومان کوردین و کوردستانیین ،کەچی هەڵکردنی ئاڵای کوردستان ناچێتە خانەی ئەو (جیاوازیی نییە )یەوە ،لە کاتێکدا من خۆم سەرنجم لەسەر ئاڵای ئێستای کوردستان هەیە کە ساڵی ١٩٩٢ لە یەکەمین دانیشتنی یەکەمین پەرلەمانی هەڵبژێراوی کوردستانی عێراقدا بوە کێشەش کە دابنرێت یان نا ؟!.
بۆیە ئەو پرسیارە بە گونجاو دەزانم ئایا لە ئاهەنگ یا کۆڕە ماتەمینییە نیشتمانیی و نەتەوەییەکاندا کامە ئاڵا رەوایی دەدات بە نیشتمانیی بونیان ،ئاڵای کوردستان ؟، یا لۆگۆی حزبێكی دیاریکراو کە خۆی سەپاندوە و خۆی کردوەتە کوێخای مەیدانەکە ؟!
سەرچاوە : سپیمیدیا
