تاڤگە سابیر
دیارە لای زۆربەو بۆ زۆربە سەختە لەوەی داوا بکەین کە مرۆڤەکان هەمیشە پرسیار بکەن لە هەلومەرجی ژیان و بوونیان بە تایبەتیی لە کاتی رووبەڕووبوونەوەی بارودۆخێکی ئاڵۆز و نەگونجاوی سیاسیی و کۆمەڵایەتیدا، یاخود لە کاتی قەیرانێک یان تەڵەزگەیەکدا کە رەهەندێکی گەردوونیی هەیە داوابکەین لە خۆیان بپرسن"رۆڵی من و بەرپرسیارێتی من چیە؟"
هەر چەندە ئەو داواکارییە بە پێی پرنسیپە هەرە سەرەتاییەکانی رەوشت و سیاسەت رەوایە و واتای مرۆڤبوون دەگەیەنێ یاخود داواکردنە بۆ بوون بە مرۆڤ، وێڕای ئەوەش ئەگەر ئەوە لەو رۆژگارەدا سەخت بێ ئەوا خۆ بە لانی کەمەوە دەشێ و بگرە رەوایە چاو لە بوونی چرکەساتێک ببڕین، چرکەساتێک بە راستیی لەگەڵ خۆ راسگۆبوون کە تێیدا هەر کەسەو لە خۆی پرسیار بکا " ئایا رۆڵ و بەرپرسیارێتی من چیە و دەتوانم چ بکەم؟".
دیارە مەسەلەکە بەو شێوە ئاسان نییە چونکێ چاوبڕین لە چرکەساتی لەو جۆرە چرکەساتی پرسیارکردن لە بوونی خۆ و لە دەوروبەر و لە لێپرسراوێتی خۆی چاوبڕینە لە چرکەساتێکی هۆشیاریی یان هۆشیاربوونەوە کە خۆی لە خۆیدا پشت بە بوونی کۆمەڵە هەلومەرجێک دەبەستێ؛ لەوانە بوونی هەلومەرجێکی مەدەنی و عەقڵی و ئاستێکی هۆشیاریی و بوونە خاوەنی هەندێ فەزیڵەتی مەدەنی کە کارێک دەکەن پرسیارکردن بە گشتیی و پرسیارکردن لە رۆڵی کەس و لێپرسراوێتی ئەو لە بەرانبەر کێشە و مەسەلەکاندا شیاو بێ، نائامادەگیی ئەو هەلومەرجانە کارێک دەکەن کە کەس لە بری پرسیارکردن لە لێپرسراوێتی خۆ سەرقاڵی بیانوو داتاشین بێ بۆ کەم ئیرادەیی خۆی و رۆڵی و لێپرسراوێتی خۆی لە بەرانبەر گشت رووداو و کێشە و بگرە هەلومەرجی بێهودەییانەی خۆی و بیانوو داتاشینێک کە خۆی راکردنە لە لێپرسراوێتی و کردنی هەموو ئەوانی دیکەیە بە لێپرسراو ئەمەش ئاسانترین شتە کە کەسێک بتوانێ بیکا و هەر ئەوەشە کە مرۆڤ بە شێوەیەکی گشتیی و بە بەرادەوامیی خووی پێوەگرتووە.
هەر یەک لە ئێمە دەزانین کە مرۆڤ بە شێوەی جۆراوجۆر و لە دیدی جیاواز جیاوازەوە پێناسە کراوە جارێک وەک ئاژەڵێکی هۆشمەند و جارێکی تر وەک ئاژەڵێکی درۆزن یاخود ئەوەی کە مرۆڤ بە سروشت "بوونەوەرێکی تەمبەڵ"ە و چەندان پێناسەیتر، بەڵام لە رەوتی ئاخافتنم زیادەڕۆیی نییە گەر بڵێم "مرۆڤ ئاژەڵێکی بیانوو داڕێژە" ئەو بوونەوەرێکە سەرقاڵی داڕشتنی بیانووەکانە؛ بیانووهێنانەوە بۆ هۆ و هەلومەرج و چییەتی و چۆنێتی شتەکان و دواجایش بیانوو داتاشین بۆ ڕۆڵ و لێپرسراوێتی خۆ و ئەو هەلومەرجەی کە تێدا دەژی "هەموو کەس لێپرسەاوە جگە لە من".
ئەوە چەند ساڵێکە کوردستان بە دەردەسەرییەکی گەورەدا تێدەپەڕێ و وڵاتێکی هەڵوەشاوە و جەستەیەکی خوێن لێڕۆیشتووە لە لایەکەوە تیرۆر و شەڕی دەستەگەریی و خێڵەکیی نێوان یەکێتی و پارتیش بەردەوامە لەلایەکی دیکە.. وڵاتەکە لە لایەن پارتەکانی دەسەڵات داگیر کراوە کە ئەوەش هۆیە سەرەکییەکەی ئەو پەشێویی و تیرۆرەیە، نەک هەر ژنەکانی لاقەدەکرێ بەڵکە سەرلەبەری وڵاتەکەش بە بەردەوامیی لاقەدەکرێ.. ئاخر داگیرکردن چیە جگە لە لاقەکردنی ئەو سەروەت و سامانەی لە لایەن دزەکانی دەرەوە و کۆمەڵێک کۆمپانیا و کەسایەتی و بەڕێوەبەرایەتی خۆیەکیی و دز و جەردەکانی نێوخۆ کە، وەک نموونەی یوفیمیزم پێیان دەڵێن " سیاسەتمەدار".. ئەوانە و هەزاران کارەسات و تراژیدیایتر بە بەرچاومانەوە روودەدەن و ویژدانمان تەکان ناخوا و رۆڵ و بەرپرسیارێتی خۆمان پرسیار ناکەین، نەک ئەوەندە بەڵکو زۆرمان سەرقاڵی بیانووهێنانەوەین.
هەموو دەزانین کە لەو رۆژانە نائارامییەک و پەشێوییەکی "سیاسیی" و ئینجا گیروگرفتی ژیانی نەبوونیی یان کەمیی پێداویستییە هەرە سەرەتایی و بنەڕەتییەکانی ژیان و هەڵسوکەوتی پڕ لە توندوتیژیی داموادەزگە پۆلسیی و ئاسایشییەکان کە خۆی لە گرتن و لێدان و کوشتن و راونانی خەڵکی نەیار و ناڕەزا لە بەرانبەر بەو دەسەڵاتە پۆلیسییەدا دەبینێتەوە باڵی بەسەر ئەو ناوچەیەدا کێشاوە؛ تارماییەک کە مانیفێستی ستەمکارییە.. ستەمکارییەک کە بە شێوەی جیاواز جیاواز هەمیشە لێرە خۆی مانیفێست دەکا.
با لە سەرەتاوە هیچ گومانێکمان نەبێ لە بینینی ئەو راستییەی کە ئەو هەلومەرجە نە ناسروشتییە و نە نالۆژیکیی و نە نۆێیە.. ئەو بارە لە لایەکەوە ریشەکەی وا لە مێژوودا و لە لایەکی دیکە درێژکراوەی بیست و یەک ساڵە لە "حوکم"کردنێکی تێکشکاوی نامەدەنییانەی دوور لە سادەترین پرانسیپەکانی حوکمکردن و دوور لە پرانسیپە هەرە سەرەتاییەکانی سیاسەت، بیست و یەک ساڵە ئەزموونێکی پڕ گرفت و دژوار ئەو باردۆخە یان هەلومەرجە سیاسییە پڕ لە ستەم و سروشتیی و لۆژیکییە درێژە پێ دەدا.. ئەوەش دەگەڕێتەوە بۆ چییەتی ئەو هێزە بە ناو "سیاسیی''انەی کە لە گۆڕەپانەکە دان.. ئەوەی ئەوڕۆ لە کوردستان روو دەدا بەواقعیکردنی ئەگەرەکانی ئەو هێزانەیە لە چییەتی و توانستی ئەو هێزانەدا.. نە ئەگەرێکی دیکەی پێچەوانەی واقیعی حاڵ بوونی هەیە و نە چاوەڕوانیش دەکرێ.. ئەگەر چاوەڕوانیش بکرێ ئەوە گومانێکی رووتە و ئەوەی روویدا و ڕوودەدا جێبەجێکردنی ئەگەرەکانی ئەو هێزانەیە کە لە دواجاردا وەک بینیمان و دەیبینین خۆی لە گەندەڵیی و ستەم و ناڕەوایی و دروستکردنی ئاژاوەیەکی "سیاسیی" و ئابووریی و کەلتوورییدا بینیەوە دەبینێتەوە.
ئێستا کاتی خۆیەتی باس لە لێپرسراوێتی جەماوەر بکەم بەرانبەر بەو ستەمکارییەی کە لە کوردستانی باشوور باڵادەستە.. لێپرسراوێتی جەماوەر بەرانبەر بەو هێزانەی کە هۆکاری ئەو هەموو گەندەڵیی و نایەکسانیی و ناڕەواییەن کە هەیە، خەسلەتێکی ناسینەوەی جەماوەر بریتییە لە بێ یادەوەریی یان کورتبینیی یادەوەریی لەوەدا کە دوێنێی لەبیر نییە.. بەڵێ دوێنێ بە واتای وشە نەک دوێنێیەکی دوور بەڵکە هەر دوێنێی لە بیر نییە.. دوێنێی رووداوەکان و دەنگوباسەکان و کێشەکان و دەردەسەریی و ئازار ئەشکەنجەکان، هەڵسوکەوتی دوێنێی بە ناو حیزب و دەسەڵات و لێپرسراوان و بەناو سیاسییەکان.. دوێنێی هەڵسوکەوتی خۆیی و رۆڵی خۆیی و لێپرسراوێتی خۆیی لە پەروەردەکردنی ئەو هێزانەدا کە ئەمرۆ لێیدەخوڕن، دیارە ئێمە بە واتای وشە "سیاسیی" یان " سیاسەتمەدار"مان نییە، بەڵام دەبێ زۆر هۆشیار بین ئەوانەی لە ژێر ئەو ناوەدا و بەو ناوووە کار دەکەن زۆر زۆرزانن و پەییان بەو خەسڵەتەی جەماوەر بردووە و بێباکانە کاردەکەن و لێدوان دەدەن چونکە دەزانن سبەی لە بیر دەچێتەوە یاخود کەسێک نییە بڵێ "ئەو وتەیەی ئەورۆت یان ئەو لێدوان و بەرنامەیەی ئەوڕۆت جیاوازە لەوەی دوێنێت''.
