چیرۆكنووس و ڕۆماننووس و رۆژنامەوانی كورد پەروەر مەحەمەد مەولود ناسراو بە (مەم)، لە رۆژی 23 / 2/ 1926 لە شارۆچكەی شەقڵاوە لە دایكبووە، خوێندنی سەرەتایی لە شەقڵاوە و ناوەندی و دواناوەندی لە هەولێر تەواوكردووە، لە سەرەتای شەستەكان بەڕێوەبەری شارەوانیەكانی هەولێر بووە و دواتر گوازراوەتەوە بۆ سەرۆكایەتی شارەوانی هەولێر و وەكو سەرۆكی ئۆفیسی گۆڤاری (هەولێر) كە یەكەمین گۆڤار بووە بە ناوی شاری هەولێر دەربچێت، لە سەرەتای ساڵانی چلەكان بە شیعر نووسین دەستی پیكردووە و بەردەوام بووە لە كاری ئەدەبی و رۆژنامەوانی لە پاشان ڕێچكەی چیرۆك نووسینی گرتۆتە بەر و لە سەرەتای پەنجاكان یەكەم چیرۆكی بە ناوی (پەنجا فلس) لە چاپ داوە و بڵاویكردۆتەوە، یەكەم چیرۆك نووسی كورد بووە كە گرێ (عقدة)ی هێناوەتە ناو چیرۆكی كوردی، لە زۆر لە رۆژنامە و گۆڤارە كوردیەكانی ئەو كات وەكوو (هیوا و بڵێسە و شەفەق و دەفتەری كوردەواری) وتارو بابەتی هەمە جۆری بڵاوكردۆتەوە، شاكارەكانی مەم ئەمانەن (چیرۆكەكانی مەم بەرگی یەكەم سالی 1970 لە چاپ دراوە، چیرۆكەكانی مەم لە ساڵی 1984 لە چاپ دراوە، گوڵەبەرۆژە كۆمەڵە چیرۆكێكی منداڵانە كە لەگەل خاتوو (ئافەرین)ی هاوسەری پێكەوە نووسیویانە، نۆڤلێتی پایزە خەون لە سالی 1987 لە دار الحریە لە بەغدا لە چاپ دراوە، ڕۆمانی ڕێگا، كاروان و سەگوەڕ، نامەكانی مەم) و لە بەرهەمە لە چاپ نەدراوەكانی (شانۆگەری خاڵۆی ڕێبوار و شانۆگەری پان)ە.
دكتۆر ئازاد حەمە شەریف كتێبێكی نووسیوە بە ناوی (مەحەمەد مەولودی شاكار نووس) كە هەندێ لە شاكارەكانی ناوبراوی كۆكردۆتەوە و لێكۆلینەوەی لە سەر كردووە. ناوبراو ئەندامی دامەزرێنەری یەكێتی نووسەرانی كوردو ئەندامی دامەزرێنەرو تا كۆچی دواییكردنی ئەندامی فەخری یەكێتی هونەرمەندانی كوردستان بووە.
لە رۆژی 7/ 5/ 1987 لە شاری بەغدا بە نەخۆشی كۆچی دوایی كردووە. بیرەوەریم لە گەل ڕەوانشاد مەحەمەد مەولود (مەم) لە نێوان ساڵانی 1978 تا 1986 چەند جارێك لە سەرۆكایەتی شارەوانی هەولێر تێكستی ئەدەبی لە چیرۆك و شانۆگەریم بۆ بردووە بۆ ئەوەی وەكو خەبیر بۆمان هەڵسەنگینێ، چونكە ئێمە لە رۆشنبیری ئەو كات هەر شاعیرێك یان نووسەرێك ئەگەر بیویستایە بەهەرمەكەی بۆ چاپ بكەین دەبوایە لە ڕێگای لێژنەی (تعضید والنشر) بێت وخەبیر بیبینێ و رای خۆی بە نووسین دەرببرێ، لەم بوارەوە ناوبراو هاریكاری زۆری كردووم.
بیرەوەری دیكەم لە گەل ناوبراو، لە مانگى ئابی ساڵی 1978 یەكێتی نووسەرانی عێراق (ملتقی القصة الاولی- دیمانەی یان كۆڕبەندی یەكەمی چیرۆك) یان هەبوو لە هاوینەهەواری سالاحەدین (سەری ڕەش)، وەزیری ئیعلامی عێراقی ئەو كات (كریم شنتاف) بوو (موفق خضر)یش بەرێوەبەری كاروباری رۆشنبیری بوو لە وەزارەت، لە گەل دائیرەی ئێمە ئەمانەتی رۆشنبیری و لاوان تەنسیقیان كردبوو كە لایەنی هونەری (فنی) ئەوان و یەكێتی نووسەرانی عێراقی بیگرنە ئەستۆ و لایەنی لۆجستی ئێمە لە دیوانی ئەمانەتی گشتی رۆشنبیری لە هەولێر، بۆیە بەندە بەو پێیەی ئەو كات سەرۆكی بەشی رۆشنبیری بووم لە دیوانی ئەمانەتی گشتی بە كارەكانی دابێن كردنی شوێنی نووستن و خواردن و گواستنەوەیان لە ناو مەسیف بۆ ناو هۆتیلەكەی سەری ڕەش رۆژانە بەیانی و ئێوارە، خۆشم بەشداری دانیشتنەكانی كۆڕبەندەكەم دەكرد.
مامۆستا مەحەمەد مەولود (مەم) یەكێك بوو لەو نووسەرانەی كە بانگهێشت كرابوو بە خۆی و شاكارەكانی بەشداری ئەم مولتەقایەی كردوو و مداخەلاتی جوانیشی دەكرد.
سەرچاوە: خۆم و ئەستێرە گەشەكان
