مامۆستا جەعفەر
حوزەیرانی ساڵی 1963 رژێمی بەعس بەیانێكی توند و زبری لە رادیۆ و تلفزیۆن و رۆژنامەكاندا دژی بەڕێزان: شێخ جەباری جەباری و عادل عیزەت ئەحمەدی جەباری بڵاوكردەوە. داوای كردبوو ئەم دوو كەسایەتیە، بە زیندوویی یان مردوویی دەست بەسەر بكرێن. گوایە: ئەم دوو كەسایەتیە ئاڵای یاخیبوونیان دژی رژێمی بەغدا بەرز كردۆتەوە و زیانی قورسیان بە سوپای عێراق و دامەزراوە گرنگەكانی گەیاندووە. بەیانەكەی رژێم، هەردووكیان بە ( الشقی ...) ناو دەبات. پێش ئەم بەیانە، حكومەتی بەغدا دژی هیچ سەركردە و دامەزراوەیەكی شۆڕش بەیانی فەرمی دەرنەكردووە.
شێخ جەبار جەباری كێیە و بۆ حكومەت ئەم بەیانە توندەی دژی ئەم و كاك عادل دەركردووە ؟
شێخ جەباری جەباری ( 1897- 1964) كوڕی سەید محەمەدی جەبارییە، سەرۆكی عەشیرەتی جەباری و پیاوێكی خوێندەوار و زیرەك بووە. سەید محەمەدی جەباری، یەكێك بووە لە سەركردە مەزنەكانی بزوتنەوەكەی شێخ مەحمودی حەفید.
شێخ جەباریش پەیوەندییەكی توند و تۆڵی لەگەڵ شێخ مەحمودی حەفید هەبووە و لە نامەیەكدا شێخ مەحمودی حەفید بە برازای ئازیز ناوی دەبات. بەدرێژایی چلەكان و پەنجاكانی سەدەی پێشوو، چەندین جار تووشی گرتن و دوورخستەوەی زۆرەملێ بووە. مەلیك فەیسەلی دووەم لە قەسری ریحاب پێشوازی لێی كردووە. بە یەكێك لە كەسایەتیە ناودارەكانی عێراق دانراوە.
پاش ئەیلوولی 1961 داوای لە هەموو ماڵێكی دێهاتی جەباری كردووە ، چەك بكڕن و خۆیان بۆ پشتیوانی شۆڕش و خەبات ئامادە بكەن. رەوانشاد مام جەلال لە تەكیەی جەباری سەردانی كردووە. سەرەتای شەستەكان لەگەڵ ژمارەیەك كەسایەتی رەوانشاد مەلا مستەفای بارزانی لە ناوپرداندا پێشوازی لێ كردوون.
عادل عیزەت جەباری: ساڵی 1960 لە تەمەنی هەژدە ساڵیدا، ئەندامی لقی كەركوكی پارتیی دیموكراتی كوردستان بووە. ئەیلوولی 1961 روو دەكاتە شاخ. لە ئەنجامی ئازایەتی و چالاكی پێشمەرگانە و ئاستی رۆشنبیری سیاسی، دەبێتە فەرماندەی هێزی گەرمیان.
ساڵی 1963 پلانێكی تۆكمە دادەنێت، بە دەستەیەكی بچووكی ( پ . م ) پەلاماری چاڵە نەوتی زەمبوور دەدەن و دەیگرن. هەرچەند هێزێكی سەربازی گەورەی رژێم، پاسەوانی ئەو چاڵە نەوتە دەكات. سەربازەكانی پاش بە دیل گرتنیان سەریان لەوە سووڕدەمێنێت: چۆن هێزێكی وا بچووك توانیویەتی لە ماوەیەكی كورتدا ئەو چاڵە نەوتە بگرێت و ئەو هێزە داماڵەخاس بكات؟
كاك عادل عیزەت: شەهیدێكی زیندووە، ساڵی 1964 لە شەڕێكی قورس دا، بە خەستی بریندار دەبێت. ئەم پیاوە ئەوەندە پاك و دڵسۆزو ئازا بووە. لە هەمان ساڵدا كارەساتی شەڕی براكوژی روودەدات. لەو كاتەوە دەڵێت (نابێ كورد دەست بخاتە خوێنی یەكتریەوە ) بەلایەوە زەحمەت دەبێت درێژە بەكاری فەرماندەیی پێشمەرگەیی و چالاكی سیاسی بدات و تا ئەمڕۆ جارێكی دی تێهەلنەچۆتەوە و بە سەربەرزی دەژێت.
هیوادارم خەمخۆران و ئەوانەی لە بواری ئەرشیڤ كار دەكەن، هەوڵ بدەن بەیانی حكومەتی عێراق سەرلەنوێ بڵاوبكەنەوە و بە تێروتەسەلی لەسەر ئەم دوو كەڵەپیاوە تێكۆشەر و خەباتگێڕە بنووسن. هێشتا بەڵگەنامەی زۆر لەبەر دەست دا ماوە و كەسانی بەتەمەنیش دەتوانن شایەتی خۆیان بۆ مێژوو بدەن. بەم كارەشیان مێژووی گەلی كورد دەوڵەمەندتر دەكەن.
سەرچاوە :خەندان
