بارزان شێخ عوسمان
بڕیارە بیستی ئەم مانگە لە سەرتاسەری عێراقدا سەرژمێرری گشتیی دەست پێ بکات.
راستە سەرژمێرری زۆر پێویستە بۆ جێبەجێکردنی چەندین ئامانج و پلانی هەر وڵات و کۆمەڵێکی مرۆڤایەتیی .
بەڵام بۆ ئەم دۆخەی ناوچەکانی نێو بازنە و چوارچێوەی مادەی ١٤٠ئ دەستوری هەمیشەیی عێراق زۆر ترسناكە لەسەر چارەنوسی ئەو ناوچانە و ساغ بونەوەی کوردستانیی بونیان .
هەڤاڵ عماد احمد ئەندامی مەکتەبی سیاسیی و لێپرسراوی مەکتەبی راگەیاندن و هوشیاریی (ی،ن،ك) ،لە وتارێکیدا زۆر بە وردیی ئاکامی پر مەترسیی ئەو سەرژمێرییەی خستوەتە رو لەسەر ئایندەی ئەو ناوچانە ، هاناو هاواری هێناوە بۆ سەرکردایەتیی سیاسیی و تەواوی ناوەندە روناکبیریی و کۆمەڵایەتییەکانی کوردستان کە ئەو سەرژمێرییە رابگیرێت و بخرێتە کاتێکی گونجاو تر .
بەڕێز شۆڕش حاجی نوسەر و روناکبیر و پێشمەرگە و کادیری دێرینی ی ن ك و پەرلەمنتاری پێشوی عێراقیش ،بە هەمان شێوە لە وتارێکیدا هەمان مەترسیی ئەو سەرژمێرییەی شیکردوەتەوە لەسەر ئەو ناوچانە بە تایبەتیی کەرکوك .بەڕێزیان زۆر راشکاوانە رونیکردوەتەوە کە سەرگرتنی سەرژمێرریەکە ، کەرکوك و کوردستانیی بونی ئەو پارێزگایە و ناوچەکانی تر بەتەواوی گەڕاندنەوەی بۆ سەرهەرێمی کوردستان لە دەست دەدات .
لە روانگەی ئەو ترسە جدییەی کە لە وتاری ئەو دو سیاسەتمەدارەدا خراوەتە رو ، دەبێت هیچ بیانویەك نەهێنرێتەوە بۆ راگرتنی ئەو پرۆسەیە .
رەنگە حکومەتی فیدراڵ و سەرانی حزبە سەرەکییەکانی عێراق بڵێن ئەوە پرۆسەیەکی ئیدارییە و کارناکاتە سەر مادەی ١٤٠ ی دەستور !، بەڵام دەبێت سەرکردایەتیی هێزە کوردستانییەکان سور بن لەسەر ئەوەی کە نەخێر بەو پرۆسەیە ئەو مادە دەستورییە لە گۆڕ دەنرێت ،چونکە وەختێك سەرژمێرری لەو ناوچانەدا رەوایە کە تەعریب و تەرحیل و تەهجیر هیچ ئاسەواری نەمابێت .
بە گوێرەی مادەکە دەبێت (بارودۆخەکە ئاسایی بکرێتەوە (تەتبیع) ئەوەش یانی بن بڕ کردن و رێشە کێشکردنی تەواوی تەعریب و ناردنەوەی هاوردەکان و گواستنەوەی سجل قید و نفوسیان بۆ شوێنی پێشویان ،گەڕانەوەی دەرکراوەکان و نفوسەکانیان بۆ ئەو ناوچانە و کەرکوک ، دوای ئەوە سەرژمێریی و پاشان راپرسیی لە کەرکوك و ناوچە جێ ناکۆکەکانی تر ).
کەچی لە دوای ساڵی ٢٠١٣ و ٢٠١٤ و ریفراندۆمە بێ دیراسەکە و ساڵانی دواتر نەك تەعریب ریشە کێش نەکراوە ، بەڵکو زۆر زیاتر چەسپێنراوە و سەپێنراوە لە کەرکوك و دەوروبەری و ناوچە جێ ناکۆکەکان .کەواتە کەی تەتبیع یا ئاساییکردنەوەی دۆخەکە جێبەجێکرا ئەو کاتە سەرژمێررییش ئاساییە بکرێت .
ئەگەر هەر مەحاڵە ئەوا دەبێت پێداگریی بکرێت لەسەر دواخستنی پرۆسەکە لە کەرکوك و ناوچە جێ ناکۆکەکان ،وەك چۆن چەندین جار هەڵبژاردن لە کەرکوک و ئەو ناوچانە لەبەر خاتری سونە یا شیعەی عروبی دواخراوە .
ئەگەریش پاساوی ئەو قەوانە سواوە بێت (وەك هەندێك لە داعشیە سونییەکان و حزبوڵاییە شیعەکان هەمیشە دەیڵێن )کە کەرکوکیش شارێکی عێراقییە، ئەوا دەبێت حاڵییان بکەن کە چەمکی عێراقی بونی کەرکوك ، هەڵەبجە ،دهۆك، هەولێر و سلێمانی ،لەگەڵ بەسرە و سەماوە ،لای گەلی کوردستان جیاوازە لەوەی ئەوان .
بۆیە پێویستە تا زوە سەرکردایەتیی سیاسیی کوردستان بکەوێتە خۆ و ئەم ئەرکە عێراقیی و کوردستانیی و نەتەوەیی و نیشتمانییە جێبەجێ بکات و بیخاتە پێش پێکهێنانی حکومەتیش ، پێویستە هیمەتەکان چڕ بکرێتەوە بۆ رەواندنەوەی ئەم هەورە رەشە ترسناکەی سەر چارەنوسی کەرکوك و ناوچە جێ ناکۆکەکانی تر
سەرچاوە : سپی میدیا
