موعتەسەم نەجم
ماخۆلانی پڕسیارێک لەم دۆخە پڕ لە چەرمەسەری و نەهاتەی ئەورۆی ئێمە، زۆرینەی سەرتەڵی کوردانی توشی سەر ئێشە کردوە، بۆچی ئەم میللەتە ناتوانێت خۆی لە تەلبەندی بەکرێگیراوان و کەتواری نا تەندروستی خۆ بە کەمزانی و ملکەچی، قوتار کات؟ شەڕ و نائارامی میوانی هەمیشەیی سەر سفرە و خوانی و هاوبەشی ژین و ژیانی بێت.
لە سەردەمێکدا مەیلی شەڕزەدە باڵی بەسەر عقڵ و هۆشی مرۆڤایەتیدا کێشابێت، شەڕ و وحشیگەرایی بووبێتە دیاردە، قەیران و برسێتی دەستیان لە هەناوی ئادەمیزادی ئەورۆ توند کردبێت و پەیامی قاتوقری و کوشتنی بە کۆمەڵ مەترسی لە سەر مانەوەی مرۆڤ، رۆژانە دەدرێت بە گوێماندا، کەچی کورد هەر لە خەونی نەزۆکی هاتنی رۆژێکی نوێ و و فریادرەسێکی ئەفسوناویدا مەستی خەیاڵێکی شرین و خۆشباوەرییەکی بێ بنەمادایە. چاوەروانی فریادرەس و چاندنی ئومێد لە سەر هاتنی داگیرکەرێک، کە رزگاری بکات، وەک وەرگرتنی بەڵێنە لە شەیتان.
ئیفلیجبوون و بێتوانایی خۆرزگارکردن لە نەهامەتی و ژیانی ژێردەستەی و شکست لە داهێنانی دونیایەکی نوێ لە سەر بنج وبنەوانەی لۆجیکی و عەقڵانی و لە سەر رێگای راستەڕێی سەردەمیانە و بونیادنانی فۆرم و مۆدێلێکی تایبەت بە خەباتی نوێی رزگاری، لە دردە کوشندەکانی ئەم میللەتەی ئێمەیە. کێ ڕێگرە لەوەی نەوەی نەوباوی کورد نەتونێت پێشەنگی نوێبونەوەو بونیادنانەوە بێت، کێ رێگرە لەوەی ئەم نەوەیە هاوێژی شەمەندەفەری ڕێگای سەخت و دژواری رزگاری نەتەوەکەی بێت؟ هیچ گومانێکم نیە، بە هەموو باوەرێکەوە لە سەر ئەو بۆچونە خۆراگرم، کە خودی نەوەکانی تەمەن هەڵکشاو رێگر و بەربەستی سەرەکی بەر هاتنە مەیدانی نەوەی نوێی کوردین، نەک دوژمنانی کورد، ئەم نەوەیە بێتوانەو کەم مەعریفە و نزم ئاست نیە، بەڵکو ئەمان کوری زەمەنێکی جیاواز لە زەمەنی ئێمەن، ئەوە ئێمەین ناتوانین لە پێداویست و ئەجندای ئەم سەردەمە و شێواز و ناوەرۆکی بیرکردنەوەی نەوەی نەوباوی کورد تێبگەین.
لە حاڵوبارێکدا گوڕگی بۆر وکەمتیاری ڕەش و وشترگەلێک بونەتە مێردەزمە و ددان لە میللەتێکی بێزەواڵی وەک کورد جیر دەکەنەوە. گورگە بۆرەکان بە توژمی ڕەشەبا گڤەی داگیکاری دەدەن بە گوویێی ئێمەدا و ئاورووژا و گەزاریان دەرکێشاوە رۆژانە ژەهری پیسی خۆیان بەسەر ئێمەدا دەرژێنن، ئێمەیش لە سەر هەمان ئاراستە بۆخۆمان لە سەر رێگای سرینەوەی یەکتر و پرۆسەیەکی گەورەی خۆکوژیداین.
کاتێک گوێ بۆ هۆشی ئاگای خۆت شل دەکەیت و دەچیتە بەر نمایشی درامایی نیشتمانێکی وێرانە و میللەتێکی داروخاو ونەتەوەیەکی خزاو، هەنتک هەنتک بەروەو ناو بۆشای و وونبوون دەچیت. چ کارەساتێکی جەرگبڕ و پڕ لە نەهامەتیە ئێمە تێیکەوتوین. میللەتێکی خۆخۆر خۆی زیاتر لە دوژمنەکەی دوژمنی خۆی بێت، چۆن مرۆ دەتوانیت ئومێدی لە سەر هەڵبەستیت؟.
نیشتمانپەروەرێکی جوانمەرد لە باکوری کوردستان هەڵدەتۆقیت و رووبەرووی درندەترین داگیرکەری سەردەم دەبیتەوە و خۆی دەکاتە قوربانی سەرفرازی میللەتەکی، شامەردێک لە رۆژهەڵاتی کوردستان لە سەر پەتی سێدارە لەنگەر دەگرێت، بە زەردەخەنەوە پێشوازی لە مەرگێکی شەرەفمەندانە لە پێناو ئازادی میللەتەکەیاندا دەکات، لاوێکی نەوباوی باشوری پڕ لە ئازایەتی رووبەرووی دەسەڵاتی چەوت و دیکتاتۆر دەبێتەوە، بە دەستی کورد خۆی تیرۆر دەکرێت، ئەفسانەیەک لە رۆژئاوای کوردستان دەخوڵقێت، نەوەی نەوباوی کورد لەم زەمەنی لاموبالاتیەدا زۆر بە تاسەوە خۆی دەکاتە سوتەمەنی رزگارکردنی نیشتمانەکەی، کەچی ئەم شامەردانە زۆر بە بێبەزیانە دەکرێنە قوربانی مەیلی باوەری چەوتی دەسەڵات زەدەیەکی کورد و خۆفرۆشێکی گڵاو و ئاڵچاغێکی ئاردەڵی بێ ویژدان و ئارەزووپیسی کورد خۆی. دۆخێک لە نائاگایدا هەندێکجار مرۆ تووشی نائومێدیەکی کوشتێنەر دەکات. بیری سافیش لە بێ ئاگایدا بەرەو پەلکێشکردنی ئادەمیزاد بۆ ڕەشبینی لە کۆی پرۆسە و خەونی لە مێژینەی رزگاری نەتەوەکەی دەبات. لەم حاڵوبارەدایە، کە مەوداو رادەی دواکەوتوی میللەت دەبێتە دیمەنێکی خەفەتهێن و پڕ لە زاخاو، مێشک و هەناو پێکەو دەخواتەوە. لە مەیش بترازێ تەرزە عەقڵی وایشمان هەیە، بە بێ ئاگا و بە پێ خاوسی دەکەوێتە ناو کێڵگەی خیانەت و خۆفرۆشیەوە، بە هۆشێکی وونەوە دەکەوێتە پێوانەو کێشانەی دۆخەکە بە گەز و یاردەی دوژمنانی میللەتەکەی خۆی.
لە حاڵوبارێکدا تۆز و خەوشی مێژووی پڕ لە چەرمەسەری وعەقڵی چەقبەستوی سەرتەڵی کورد یەکانگیر دەبێت، لە گەڵ زەبر و جەوری ئاڵوگۆری چەرخدا، دەرئەنجام تەوژمەکانی چەرخی نوێ و گۆڕانکاریەکانی سەردەم لە بڕی ئەوەی ببنە پاپاچینە و هاوکار بۆ پەرینەوەی بەرەو کەناری رزگاری، دەبنە دەستاڕی خەون و خواستەکانی نەتەوەی و نیشتمانی کورد.
رووناکبیرانمان هێشتا لە دەروازەی گۆرانکاریکان و ژیار و فەرهەنگی نوێی هاوچەرخ دا واقیان ورماوە. کاکی رووناکبیر و مامی شۆرشگێر تا ئەورۆیش جیهان بە عەیارەی کۆن، سەروبن و کێشانەو پێوانە دەکەن. ناتوانن نە دنیابینیان بگۆڕن و نە کەرەسەی بیرکردنەوەیان. لە لایەکی دیشەوە خۆشەمەنیەکانی دونیا وای لە بەشێکی زۆر لە روناکبیران و پیاوانی هزر و سیاسەتیس کردوە شا ئامانجی خۆیان لە بیر بکەن و لە پێناو بەرژەوەندی و خۆشیە رواڵەتیکانی ژیان بکەونە شوێن خەیاڵێکی نەزۆک و لە بەرژەوندی نەیارانی میللەتەکەیان عەقڵ و بیریان تاو بدەن. لەم بارەدا بە بێ ئاگایش بێت، دەبنە کەرەسەیەکی ئاڵووێری بازاری سیاسی داگیرکەران و نەیارانی میللەت. بە ڕاستی ئەم کەتوارە خەفەتهێنە، ئەگەر لە ژێر چەتری نەزانیشدا بێت، هەر روناکبیرێک بەشدار بێت لە بەخاشاککردنی فەرهەنگی میللەتەکەی، ناچێتە ناو بازنەی نەزانی و بەهەڵدا چونەوە، بەڵکو بە بێ ئاگای بیت یان بە ئاگاوە لە پاسی خیانەت و خۆفرۆشی سەر دەکەویت. خۆشمەنیەکانی ژیان چاوی لێڵ دەکات و گوێی کەڕ دەکات لە ئاست راستەیەکاندا. لە کاتێکدا راستیەکان بە بەردەوامی بەدەنگی بەرز هاوار دەکەن زایەڵەی دەنگی هەقبێژی مرۆ کاس دەکات.
سنگ دەرپەراندن و دڵگەرمی و خوێنکوڵانی کەسانێکی پاشەڵ پیس و گەندەل و کۆنە نۆکەر بۆ لای کوشتن و ئەشکەنجەدان و گەرمکردنی شەڕی ناوخۆ، تەنیا بۆ ئەوەی شۆرشگێری خۆیان بسەلمینن، فێڵێکی زانراوی برایم زەبۆکە سیاسیەکانە. ئەمانە و بەشداربوانی پرۆسەی ئەفراندنی شەڕ و نەهامەتی لە واقعدا بکوژی بێ بەزەی مێژووی سەروەوەری ئەم میللەتەن. بەڕاستی ئەم کەتوارە دیمەنێکی شەرمهێنەرە، مرۆ لە ئاستیدا ئارەقەی دەردو ئازەر دەچۆرینیت.
سەرچاوە : سپی میدیا
