پەندی پێشینان
قەزای دێزە کەوت لە گۆزە
کاتێک بەڵایەک بۆ یەکێک دێ و بەر یەکێکی‌تر ئەکەوێ.
لەگەڵ گورگا گۆشت ئەخوا، لەگەڵ مەڕا شین ئەکا
بەیەکێک ئەوترێ کە لەگەڵ تۆش بێ و لەگەڵ دوژمنەکەشت بێ.
ئاردی بێژراوە، کەپەکی ماوە
واتە: باشی ڕۆیوەو خراپی ماوە
نە شەرع بە مەلا، نە عورف بە ئاغە
واتە: مەلا لە شەرعا دەسی هەیە و ئاغاش لە عورف و ڕەسمی ڕۆژا شارەزایەو تۆ لەو دوو بارەوە دەرەقەتی ئەوان نایی.
نە دەم ها کردنم هەیە، نە پای ڕاکردن
واتە: من لە خۆما نایبینم کە بتوانم لەو کێشەدا هاوبەشی بکەم.
کۆنەی خۆت پینە و پەڕۆ کەو تازەی مەردم لەبەر مەکە
واتە: بە کەم‌وکوڕی خۆتەوە بسازە و ڕوو لە بێگانە مەنێ .
کونا مشکی لێ بوەسە قەیسەری
بە یەکێک ئەوترێ کە زۆر ترسابێ و لە بیری خۆشاردنەوەدابێ و کون بە کون دەرچێ.
بۆیە پێت ئێژم کاکە، چۆلەکەم بۆ بگری
واتە: بۆیە خوڵتەت پێ ئەکەم، کەلێکم بگری.
