نوێترین دیوانی شیعری شاعیر (لەتیف هەڵمەت) بەناونیشانی (یەك خوداو هەزارو یەك ڕێگا بۆ بەردەرگای ماڵی یار) چاپكرا.
لەبارەی چاپكردنی دیوانەكەوە، لەتیف هەڵمەت-ی شاعیر نووسیویەتی: ئەم دیوانەم دەبوو ساڵی 2021 چاپكرێ، بەڵام بەهۆی نەخۆشی و ناتەندرووستیمەوە لەچاپخانە دوامانخست و بڕیارماندا لەسەرەتای ساڵی 2022 دا چاپبكرێ و دیسان لە كاتی دیاریكراودا نەخۆشی بواری چاپكردنی نەدام، ئیتر سێ و چوار مانگێك بەر لەئێستا هەلێك ڕەخسا و پشت بەخوای گەورە چاپكرا.
لەبەشێكی دیكەی نووسینەكەیەدا هاتووە (شایانی گوتنە كە بڵێم تەنها سەدو پەنجا دانەم لێچاپكردووە، لێرەدا دەبێ زۆر زۆر زۆر سوپاسی برا و ئازیزی دڵم مامۆستا عەتای خاوەنی چاپخانەی كارۆ بكەم كە خۆی سەرپەرشتی چاپی دیوانەكەمی كردو لەدوای چاپكردنی بەتۆمبێلەكەی خۆی بۆی هێنامەوە بۆ ماڵەوە و بڕێكی باشیش لەنرخی چاپكردنەكەی بۆ داشكاندم).
لەتیف هەڵمەت تا ئێستا دەیان بەرهەمی چاپكراوی هەیە لەبواری (شیعر- بەزمانی كوردی و عەرەبی، لێكۆڵینەوەی ئەدەبی- بەزمانی كوردی و عەرەبی، شیعرو چیرۆك بۆ منداڵان، چیرۆك و شانۆنامە، بابەتی وەرگێڕدراو لەعەرەبییەوە، ڕۆمان).
هەروەها بەرهەمەكانی لەڕۆژنامە و گۆڤار و بڵاوكراوەكاندا بەعەرەبی و فارسی و توركمانی و ئەڵمانی و ئینگلیزی و هۆڵەندی و سوێدی و فەرەنسی بڵاوكراونەتەوە.
سەرچاوە: galawej
