محەمەد خۆشناو
دووڕوویی « نفاق» مەترسیدارترین شتە کە دووچاری کۆمەڵگا دەبێت ، مێژووی دووڕوویی کۆنە و ڕەسەنە و بەقوڵی ڕەگی داکوتاوە و دەیان لقی لێبۆتەوە ، بەڵام قەیرانی هاوچەرخی ئێمە لە تەشەنەکردنی دیاردەی دووڕوویی ، درۆی ئاشکرا ، ساختەکردنی ڕاستیەکان ، شێواندنی وشەکان لە بابەتەکانیان ، هەموو ئەمانە بونەتە دروشمی ئەو سەردەمە و ، دوای بڵاوبونەوەی سۆشیالمیدیا بە هەموو جۆرەکانیانەوە دووڕوویی بۆتە هونەر و زانست کە ئامانجی خۆی هەیە لە لێدوانی ساختە و درۆ و ڕۆیشتنی بەناو چەندین فلتەر و کردنی بە ڕاستی لە ویژدانی خەڵک و ، دۆخەکە وا سەراوژوور دەکەن کە کۆمەڵگە بەچاو نەبینێت بەڵکو بەگوێ ببینێت ، هونەری دووڕوویی هونەرێکی بەرزە لەگەڵ دروستبوونی دەسەڵات لە هەرێمی کوردستان ئەو هونەرە لەبرەودایە ، بەڕاستی هەقی خۆیەتی قوتابخانە و پەیمانگای تایبەت هەبێت بۆ مەشقپێکردنی خەڵک تا چۆن دووڕویی بکەن و چۆن پێچەوانەی ئەوەی دەیبینن و پێچەوانەی ئەوەی لەوبڕوایەدان قسەدەکەن بێئەوەی کەس ئاشکرایان بکات یان چاوی خەڵک بەدوایانەوە بێت ، زۆر کەس هەوڵیاندا مومارەسەی دووڕوویی بکەن بەڵام فەشەلیان هێنا و مومارەسەکانیان بە ڕێگایەکی ئاشکرا بوو و کاریگەری و ناوەڕۆکەکەی ون بوو ، هونەری دووڕویی بریتیە لە گەیاندنی شتێکی کڵۆڵ بە خەڵک و ئەمە بەسوود پێشانی خەڵکەکە بدەیت بەئامانجی ئەوەی پێی بڕوابکەیت ، ئەمە جۆرێکە لە فریودان ، بەکورتیەکەی ئەوەی باش لە هونەری دووڕوویی بزانێت ئەمە ترسناکی ڕاستەقینەیە ، بەڵام ئەوەی لێینەزانێت ترسی لەسەر نیە ، چەندان پلەی دووڕوویی هەن دووڕووی مەترسیدار ئەو کەسەیە کە درک بە فریودانی ناکەیت چونکە بەڕاستگۆیی درۆ دەکات ، ئەرێ با بە خەیاڵی خۆمان پرسیارێک بکەین : ئایا دووڕوو توڕەدەبێت و هەست بە ئیرەیی بوونی دووڕووی تر دەکات کە کێبڕکێی لەگەڵ دەکەن و تەنگەتاوی هەلی دەستکەوت و خۆنزیکردنەوە لە خاوەن نفوز دەکەن ، یان پێیان وایە تا چەند گەمەکەرە دووڕوەکان لە یاریگاکە زیاد بن ئەو هەست بە بەختەوەری دەکات ، چونکە ئەمە هەستی لاوازی هەڵدەگرێت و هەست بەوەدەکات کە ئەوەی ئەو دەیکات هەر تەنها ئاسایی و سروشتی نیە ، بەڵکو کارێکی خواستراوە و خوێنکاری تامەزرۆی هەیە کە چاوەڕێی دەرفەتن ؟ دووڕوویی لاتێکە لەناو جەماوەرێکی گەوجەوگوجەردا و مەترسیەکی ڕاستەقینەن و ترسناکترن لە داعش و ڕێکخراوە تیرۆریستیەکانی تر و ئەمانە بۆمبێکی تەوقیتکراون لە دەوروبەری بەرپرسان و خانەوادەکان بۆ تێکدانی ئاسایشی کۆمەڵایەتی و بەهەڵدێربردنی نیشتیمان ، خوای گەورە کوردستان و خەڵکەکەی لە زیانی دووڕووەکان بپارێزێت و ، تێڕوانینمان ڕۆشنبکاتەوە بۆئەوەی بیانبینین و ئاشکرایان بکەین
سەرچاوە : سپی میدیا
