بڕیارە رۆژی سێشەممە 14ـی حوزەیرانی 2022، زنجیرە درامایەکی نوێی تورکی بەناوی "هەڵاتن" لە پلاتفۆرمی دیزنی پڵەس تورک بڵاوبکرێتەوە، کە باس لە دۆخی کوردانی ئێزیدی لە شنگال دەکات لەو کاتەی لەژێر دەستی رێکخراوی داعشدا بوو.
پلاتفۆڕمی دیزنی پڵەس تورک Türk Disney+ لە کۆمپانیای زە وۆڵت دیزنی The Walt Disney لە پلاتفۆڕمی دیجیتاڵیدا، ترەیلەری زنجیرە درامایەکی تورکی بەناوی "هەڵاتن" بڵاوکردەوە و رایگەیاند، یەکەم ئەڵقەی زنجیرەکە کاژێر 22:00ـی شەوی سێشەممە 14-06-2022 بڵاودەکرێتەوە. دراماکە باسی دۆخی کوردانی ئێزیدی لە شنگال و ئازار و نەهامەتییەکانیان دەکات لەو کاتەی لەژێر دەستی رێکخراوی داعشدا بوون.
ئەنگین ئاکیورەک، ئەکتەری بەنێوبانگی تورکیا رۆڵی سەرەکی لە دراماکەدا دەبینێت، هەروەها ئیرەم هێلڤاجیئۆغڵو، خانمە ئەکتەری بەنێوبانگی تورکیا لەگەڵ ئەنگین رۆڵی پەیامنێری جەنگ دەبینن. ئەو دوو ئەکتەرە لەگەڵ ژمارەیەک رۆژنامەڤان هەوڵدەدەن رووماڵی رووداوەکانی داگیرکردنی شنگال لەلایەن داعشەوە بکەن و لە نزیکەوە ئاگاداری دۆخی کوردانی ئێزیدیی بن.
سەرەتا ئەم گرووپە رۆژنامەڤانە بەنهێنی خۆیان دەگەیێننە گوندێکی شنگال. بەرلەوەی دەست بە رووماڵ بکەن، لەلایەن داعش بەدیل دەگیرێن. ئیدی لەماوەی بەدیلگرتنیاندا شایەتی ئەو کارەسات و کۆمەڵکوژییانە دەبن کە داعش بەسەر کوردانی ئێزیدی دەهێنێت.
ئاکیورەک و هێلڤاجیئۆغڵو لەگەڵ گرووپی رۆژنامەڤانان هەوڵدەدەن خۆیان رزگار بکەن لەم دۆزەخەی تێیدا دەژین بۆ ئەوەی رووداوەکان بەهەموو جیهان بگوازنەوە و هەوڵی هەڵاتن دەدەن.
سیناریۆی ئەم زنجیرە درامایە لەلایەن عەلی دۆغانچای نوسوراوە و یاغز ئاڵپ ئاکایدن، دەرهێنەری دراماکەن، کۆمپانیاکانی O3 Medyaی تورکی و Same Filmی ئەمریکی، ئەرکی بەرهەمهێنانی فیملەکەیان لە ئەستۆ گرتووە.
سەرچاوە: rudaw
