د. ئەحمەد فاتح محەمەد
"بەشی یەکەم"
لە دوای تێپەڕینی زیاتر لە سێ دەیە بەسەر حوکمڕانیی کوردییدا لە هەرێمی کوردستان، کاتی هاتووە بپرسین: ئایا شۆڕش و قوربانییدان و ماڵوێرانییەکانی گەلی کورد، بۆ ئەم جۆرە لە دەسەڵاتدارێتیی ئەمڕۆی هەرێمی کوردستان بوو؟! ئەم پرسیارە پرسیارێکی بونیادییە و دەبێت هەڵوەستەی لەسەر بکرێت.
گەلی کورد لە هەرێمی کوردستاندا و لە هەزارەی سێهەم و لە سەردەمی زیرەکیی دەستکرددا مافی خۆیەتی بپرسێت: ئایا وەک گەلانی دونیا شایستەی حوکمێکی خۆماڵیی ڕەشید نین وەک ئەوەی دەگوترێت؟ گەل دەپرسێت ئەمە چ سەردەمێکی ناشرین و بێمۆراڵە کە دەسەڵاتی خۆماڵیی تەی دەکات؟ لە دوای «٣٠» ساڵ لە حوکمڕانیی گەلی کورد لە هەرێمی کوردستان نەفرەت لەم دەسەڵاتە دەکات و بگرە بە سەرچاوەی ئاشوب و نەهامەتیی و ماڵوێرانییشی دادەنێت.
ماوەی نێوان ١٩٩١ بۆ ٢٠٠٣، پڕمەینەتییترین ساڵانێکە کە گەلی کورد تێیدا ژیاون، هەر لە تاڵانکردنی دامودەزگا خزمەتگوزارییەکانی حکومەتەوە بۆ دابەشبوونە ناتەندرووستەکانی نێو پەرلەمان و حکومەتی فیفتیی بەفیفتیی و تۆخکردنەوەی مۆرکی حزبایەتی بەسەر تاک و کۆمەڵگادا تا دەگات بە شەڕی براکوژیی و دەستێکەڵکردن لەگەڵ وڵاتانی دەرەکییدا بۆ شکاندنی ئیرادەی یەکتری؛ پاشان لە ساڵی ٢٠٠٣ تا ٢٠٢٤، پاشەکشێی یارییکەرانی ناو کایەی حوکمڕانیی کوردیی بە بەرەی دەسەڵات و ئۆپۆزسیۆنەوە لە تەواوی ئاستەکانی وەک سەربەخۆیی ئابووریی موزەییەف و بەرهەمهێنانی ئۆپۆزسیۆنێک کە لە بری ئومێد وەهمی دەرخواردی خەڵک دا، دەبینرێت.
جگە لەوانەش پشتگوێخستن و لە بیرکردنی ماددەی ١٤٠ و ئەنجامدانی ڕیفراندۆمی وەهمی و وتێکچونی هاوسەنگیی هێز و لەدەستدانی بەشێکی خاکی کەرکوک، ڕیزێک شکستی دیکەی دەسەڵاتن سەرئەنجامیش بە دەسەڵات و ئۆپۆزسیۆن و ڕەوتی پۆپۆلیستییەوە هیوا و خەونی چەندین ساڵەی گەلیان بە کۆرپەیی و لەناو لانکەدا خنکاند.
هەربۆیە ئەمڕۆ گەلی کورد لە بێئومێدتریین قۆناغەکانی خۆییدا دەژی و تێیدا ڕەشبینیی سنوورەکانی دیاردەشی تێپەڕاندووە و بووە بە فاکتێکی دانەبڕاو لە ژیانی ڕۆژانەی خەڵک و بەرەو سەرگەردانبوون و ونکردنی ئاڕاستەی ئێستا و داهاتوو پەلکێشیان دەکات، بە ڕادەیەک کە بە ئاشکرا نەفرەت لە هەموو پیرۆزییەکانی خۆی دەکات؛ لە کاتێکدا مێژوو شاهیدی ئەو ڕاستییەیە، کە ئەم گەلە ستەمدیدەیە لە ڕابردوودا هەمیشە گەلێکی فیداکار و گیانبەختکەر بووە بۆ خاک و وڵاتی خۆی.
کەواتە ئەوەی ئێستا دەگوزەرێت لە سایەی حوکمڕانیی نادرووست و ناجۆری خۆماڵییەوە هاتووەتە بەرهەم.
سەرچاوە : هاوڵاتی
