دیالۆگی نیشتمان ..
ڕێکخراوی دیالۆگی نیشتمان نیگەرانی قووڵ و دژایەتییەکی توندی خۆی بەرامبەر بە هەموارکردنی پێشنیارکراوی یاسای باری کەسیی عێراق دەردەبڕێت، کە لەم دواییانەدا لەلایەن هەندێک کوتلەی سیاسی و ئایینیەوە پاڵیان پێونراوە بۆدەرکردنی .. ئەم هەموارکردنانە ئەگەر پەسەند بکرێن، مەترسییەکی گەورەن بۆ سەر ماف و ئازادییە مەدەنییەکان کە کۆمەڵگای عێراق لە دەیەکانی ڕابردوودا بە توندی خەباتی بۆ کردووە. ڕێکخراوی دیالۆگی نیشتمان پێی وایە ئەم هەموارکردنانە هێرشێکی ڕاستەوخۆیە بۆ سەر کەرامەت و ئازادی و مافەکانی ژنان و منداڵان و هەنگاوێکە بۆ دواوە و شکستهێنانە بەگشت ئەوهەنگاوانەی چەندین ساڵەنراون بۆبەدیهێنانی کۆمەڵگایەکی ئازادوسەربەخۆتر و دادپەروەرانەتر.
دەستدرێژییەک بۆ سەر مافە مەدەنییەکان و یەکسانی جێندەری
هەموارکردنە پێشنیار کراوەکانی یاسای باری کەسی تەنیا دەستکاریکردن نین؛ لە بنەڕەتدا ڕووخاندنی لایەنە پێشکەوتنخوازەکانی یاساکەن کە زیاتر لە شەش دەیە لە شوێنی خۆیانن. ئەم گۆڕانکاریانە هەڕەشەی بچووککردنەوەی ژنان دەکەن بۆ هاووڵاتیانی ژێر پلە دوو، مافی میرات و خاوەندارێتی و ئۆتۆنۆمی بەسەر جەستەی خۆیاندا زەوت دەکەن. بە بەهێزکردنی هەندێک کەسایەتی ئایینی و سەرکردەی عەشیرەتەکان کە کۆنترۆڵی بێ وێنەیە بەسەر پرسەکانی هاوسەرگیری و جیابوونەوە و سەرپەرشتیکردندا، ئەم هەموارکردنانە دەتوانن بە توندی سەروەری یاسا و بنەماکانی هاوڵاتیبوون لە عێراقدا تێکبدەن.
بەپێی ئەم هەموارکردنانە، دەکرێت ژنان لە مافی سەرپەرشتیکردنی منداڵ بێبەش بکرێن و لە تەمەنێکی گەنجیدا ناچاربکرێن هاوسەرگیری بکەن- ئەمەش پراکتیزەیەک کە نەک هەر کۆنە بەڵکو بە قووڵی نامرۆڤانەیە. پێشنیاری بەستنەوەی مافی نەفەقەی ژن بە ئامادەیی بۆ تێرکردنی داواکارییە سێکسییەکانی هاوسەرەکەی، بە تایبەتی جێگەی قێزەونە، پەیوەندییە هاوسەرگیرییەکان کەمدەکاتەوە بۆ مافی پیاو بەکڕینی ژن وەک کاڵایەک وئاڵوگۆڕێکی مامەڵەیی بازرگانی و پێشێلکردنی کەرامەتی سەرەتایی مرۆڤ.
ئەجێندای شاراوەی ئیسلامی سیاسی!
ڕێکخراوی دیالۆگی نیشتمان ئەم هەموارکردنانە وەک بەشێک لە ئەجێندایەکی فراوانتر دەناسێت کە ئیسلامی سیاسی لە عێراق لەو کاتەوەی دوو دەیە لەمەوبەر هاتۆتە سەر دەسەڵات. ئەم ئەجێندایە هەوڵدەدات ئەو دەستکەوتە پێشکەوتنخوازانە بگەڕێنێتەوە کە بزووتنەوە فێمینیست و یەکسانییەکان بەدەستیان هێناوە و کۆمەڵگەی مەدەنی سەرکوت بکات و نەزمێکی کۆمەڵایەتی کۆنەپەرستانە بسەپێنێت. ئەم هێزانە گرنگییەکی کەمیان بۆ باشترکردنی بارودۆخی ژیانی خەڵکی عێراق یان چارەسەرکردنی پرسە زەقەکانی وڵات، وەک هەژاری، نەبوونی خزمەتگوزاری و گەندەڵی بەربڵاو نیشانداوە. بەڵکو سەرنجیان لەسەر چەسپاندنی دەسەڵات لە ڕێگەی سیاسەتی دابەشکاری و پاشەکشەییەوە بووە.
شێوازی پێشکەشکردنی ئەم ڕەشنووسە یاسایە- لەناکاو و بەبێ پەیڕەوکردنی ڕێکارە دروستەکانی پەرلەمانی- ڕەنگدانەوەی بێهیوایی و تاکتیکی ژێردەستەی لایەنگرانییە. بە بەستنەوەی پەسەندکردنی ئەم یاسایە بە پەسەندکردنی پڕۆژە یاسای لێبوردنی گشتی، پەنایان بۆ ڕەشبگیری بردووە، ژیانی هەزاران زیندانییان وەکو موزایەدەیەک بەکارهێناوە بۆ پێشخستنی کارنامەی کۆنەپەرستانەیان.
بانگەوازێک بۆ کاردانەوە لە گشت ڕۆشنبیران پێشکەوتنخوازان..
لە کاتێکدا سەرۆکایەتی پەرلەمانی عێراق ئەم بڕیارەی لە کارنامەی دەستبەجێی خۆی لابردووە، مەترسییەکە هەر ماوەتەوە. پێدەچێت هێزەکانی پشت ئەم هەموارکردنانە لە ڕێگەی موزایەدەی سیاسی و دەستکاریکردنەوە بەردەوام بن لە هەوڵەکانیان بۆ سەپاندنی ئەم یاسای پاشەکشەیە. بۆیە ڕێکخراوی دیالۆگ نیشتمان داوا لە هەموو هێزە پێشکەوتنخوازەکان دەکات- ئەوانەی لە پێناو ئازادی و یەکسانی ومافی مرۆڤ و دادپەروەریدا وەستاون- بە وریا یی و یەکگرتوویی بمێننەوە لە دژایەتیکردنی ئەم هەموارکردنە مەترسیدارانەدا.
هەروەها ڕێکخراوەکەمان باوەڕەکەی دووپات دەکاتەوە کە سیستەمی سیاسی ئێستا کە بە توندوتیژی و دەسەڵاتی میلیشیایی و گەندەڵی تایبەتمەندە، شەرعییەتی دەرکردنی یاساکانی نییە کە کاریگەری لەسەر ژیانی ملیۆنان کەس هەبێت. زۆر گرنگە کە گەلی عێراق بەرەنگاری ئەم هەوڵانە بێتەوە بۆ تێکدانی مافەکانی و کاربکات بۆ دامەزراندنی حکومەتێکی نوێنەرایەتی و دادپەروەری ڕاستەقینە- حکومەتێک کە ڕێز لە ئیرادەی خەڵک بگرێت و بەهاکانی یەکسانی و کەرامەتی مرۆڤایەتی بەرز ڕابگرێت.
لەکۆتاییدا ڕێکخراوی دیالۆگی نیشتمان داوا لە هەموو عێراقییەکان دەکات، بەتایبەتی ژنان و گەنجان، بەردەوام بن لە خەباتی خۆیان لەدژی ئەم یاسایە پێشنیار کراوە و ئەو هێزانەی لەپشتەوەیە. ئایندەی کۆمەڵگای عێراقی پەیوەستە بە توانای بەرەنگاربوونەوەی ئەو هێزە پاشەکشەکارانە و بنیاتنانی کۆمەڵگایەک کە بەهای هەموو ئەندامەکانی بە یەکسانی بدات، بەبێ گوێدانە ڕەگەز، ئایین،وئاینزا ،نەتەوە یان پێگەی کۆمەڵایەتی.
