سەلما تۆما كاكۆ
فاتە هەڵۆ، ناونیشانی كتێبێكی نووسەر زرار سەرتاشە، لە ساڵی 2022 لە چاپخانەی حەمدی لە سلێمانی چاپكراوە، جێگەی ئاماژە پێدانە ئەم رۆمانە لە دوو توێی كتێبێكی 136 لاپەڕەدا نووسراوە و، لە 19 بەش پێك دێت كە هەموویان گرێدراوی یەكترن. ئەم رۆمانە باس لە چالاكییەكانی ژنێكی شۆڕشگێر دەكات لە دەڤەری خۆشناوەتی، كە چۆن بووەتە كاریزمایەك و بە كارەكانی شۆڕش دەچێتە قۆناغێكی تری نیشتمانپەروەرییەوە .
هەژارین لە دەرهێنەری باش و سیناریست
ژن هەمیشە كەرەستەیەكی باش بووە بۆ نووسەران تا وەگەڕی بخەن بۆ نێو نووسین، وەكو ئەفسانە یان كاریزما لە نێو گەلاندا هەبووە و وەك قارەمان بە سەرمایەی نەتەوە سەیركراوە، گەر هیندییەكان ژنێكی وەكو لاكشیما بكەنە كاریزما و پاڵەوان كە بۆتە سەرمەشقی ئازادی بۆ هیندییەكان و دژی ئینگلیز وەستایەوە، گەر لیبییەكان لە فیلمی عومەر موختاردا قارەمانێتی ژنی لیبی نیشان بدەن دژی ئیتالیا، ئەوا لەناو كوردیشدا چەندین قارەمان و كاریزما و سەركردەی ژن هەیە كە چیرۆكەكانیان ئەگەر لەوان گرنگتر نەبن ئەوا كەمتر نین، بەڵام ئێمە میللەتێكین سینەمامان نییە، هەژارین لە دەرهێنەری باش و سیناریست. بۆیە ناتوانین ئەو هەموو چیرۆكە بكەینە فیلم، تا بە دونیا بڵێن ژنانی كورد هە میشە پاڵپشتی شۆڕش بوون و گەلێ كاری سەختیان كردووە، وەكو كاری تەتەری و نامە گواستنەوە و تیمار كردنی پێشمەرگە بریندارەكان و هەڵواسینی پۆستەری شۆڕش لە كووچە و كۆڵانەكانی شار و خزمەتكردنی پێشمەرگە بە نهێنی و زۆری تریش، هەر بۆیەش لە ئازاری بەندیخانەكان و زیندان و لەسێدارەدان بێبەش نەبوونە.
ئەوە ژنە سەرەڕای بەرپرسیارێتی هاوسەریی و ئەركی پەروەردەی منداڵ قوربانی یەكەمە و پشكی شێری بەردەكەوێت لە ئازار، كاتی شەهید بوونی هاوسەری یا برای یا كوڕی لەبەرەكانی جەنگدا .
جێگەی داخە كورد ئەو ژنە قارەمان و چاو نەترسانەی هەیە كەچی كەناڵەكانی تیڤی و راگەیاندنەكان رۆڵێكی گرنگیان نەبووە لە ناساندنیان بە تەواوی جیهان و تەنانەت خەڵكی كوردستانیش ، هەروەها چەندین چیرۆكی جوان لە رۆحی ژن و شۆڕشدا هەن نەتوانراوە بكرێن بە شاكاری جیهانی .
رۆڵی فاتە هەڵۆ لە نێو شۆڕشدا
نیشاندانی رۆڵی فاتە هەڵۆ لە نێو شۆڕشدا لە سنووری شەقڵاوە و ئاشناكردنی خوێنەر بەو سنوورەی كە وێستگەی خەباتی ئەم ژنە پاڵەوانە بووە، هۆكارەكەی ئەوەیە فاتە هەڵۆ خەڵكی شەقڵاوەیە و زۆر باش شارەزای سنوورەكەیەتی.
هەمیشە هەوڵی داوە ئەركەكانی بە سەركەوتوویی جێبەجێ بكات گەرچی ئەو ئەركانە زۆر مەترسیدار بوون لەو سەردەمەدا، چونكە رژێم هەموو شارو دەوروبەری تەنیبوو بە سەرباز و سیخوڕ .
نووسەر لە زاری ئەم ژنەوە رووداوكان دەگێڕێتەوە
گومان لەوەدا نییە یەكێك لە جوانییەكانی ئەم رۆمانە ئەوەیە كە ئەدەبی گێڕانەوەیە و زادەی خەیاڵی نووسەر نییە، بەڵكو نووسەر لە زاری ئەم ژنە و چەندین پێشمەرگەی ئەو سەردەمە رووداو و بەسەرهاتەكانمان بۆ دەگێڕێتەوە بە زمانێكی سادەی كوردیانە كە چێژی خوێندنەوە دەبەخشێتە خوێنەر لە كاتی خوێندنەوەیدا.
لە رووی تەكنیكەوە نووسەر جوان دەستیپێكردووە كاتێك لە بەشی یەكەمدا لە رێگەی گەڕانەوەی پێشمەرگەیەكی خەڵكی شەقڵاوە لە تاراوگە بۆ كوردستان كە هەر لەگەڵ هاتنە ناو سنووری شەقڵاوە دەستدەكات بە گێڕانەوەی چیرۆكی برینداربوونی خۆی و تیماركردنی لەلایەن فاتە هەڵۆوە كە چۆن لە مردن رزگاری كردووە، وەك چۆن لەلاپەڕە( 29و 30) ی بەشی دووەم هاتووە :
درەنگ تێگەیشتم كە برینەكەم چەندە سەخت بووە، زۆر دوای گەیشتنم بۆ تاراوگە و سەردانی كردنی دكتۆرەكان وتیان: چۆن لە ژیان ماوی و نەمردووی؟ چ دكتۆرێكی شارەزا سەرەتای برینداربوونت لە وڵاتەكەت چارەسەری كردووی. منیش پێدەكەنیم پێم دەگوتن:
- دكتۆرە فاتە هەڵۆ. ئەوان هەرگیز نەیان دەزانی فاتە هەڵۆ كێیە، چ دكتۆرێكی بلیمەت بووە، لای خۆیان ستایشی ئەم دكتۆرە نەخوێندەوارەیان دەكرد.
فاتە هەڵۆ لە پێناوی پاراستنی گیانی پێشمەرگەكان هەمیشە سەركێشی كردووە.
ئەوەتا لەلاپەڕە 45 و 48دا هاتووە:
لەو كاتەی فاتە هەڵۆ خەریكی لێخوڕینی چێڵەكان بوو بۆ ناو گاڕان، دەبینێ كەسێك بە راكردن بۆ لای گەڕەكەكەیان دێت، هەناسەی سوار بووە، لە دوورەوەش دەنگی ئەو سەربازانە دەبیستێ كە دەنگە دەنگیانە و هاوار دەكەن بۆ كوێ چوو؟ مەردانە بەبێ گوێدانە ترس خۆی لێ دەكاتە خاوەن و دەیباتە ماڵەكەی خۆیان و لە ناو كادینەكە حەشاری دەدات و دواییش دەیگەیەنێتە ناوچە ئازادكراوەكان و پێی دەڵێت لێرە بەولاوە نیشتمانی پێشمەرگەیە و رزگاری دەكات .
وەكو ناونیشان ئەم ناونیشانە سەرنجمان پەلكێش دەكات بۆ یەكێ لە گیاندارە چڕنوك تیژو بە هێزەكان كە ئەویش هەڵۆیە، هەڵۆ هێزێكی لە رادەبەدەری هەیە بۆ راوكردن، كۆڵ نادات تا نێچیرەكەی راو دەكات، هەمیشە دەسەڵاتی لە ئاسماندایە و لە وێوە كۆنترۆڵی زەوی دەكات، لە بەرزاییەكاندا ماڵ دروست دەكات، دڵسۆزی بەچكەكانییەتی، چل ساڵ بۆ حە فتاساڵ دەژی هێزێكی باوەڕنەكراوی هەیە، پێدانی سیفەتی (هەڵۆ) بە فاتە هەڵۆ هێزو توانای ئەم ژنە قارەمانە نیشان دەدات .
ئاماژە بە رۆڵی مەزنی ژنی كورد دەكات
بوونی ئەم رۆمانە بەیەكێ لە هەنگاوە گرنگەكان دەبینم لە نێو رۆمانی كوردیدا كە ئاماژە بە رۆڵی مەزنی ژنی كورد دەكات لە نێو بزافی شۆڕشگێری نەتەوەكەماندا و چالاكییە لە رادەبەدەرەكانی ژنێكمان بۆ دەگێڕیتەوە لە ناو شۆڕشدا كە شایانی ئەو نازناوەیە. چونكە نووسینی رۆمان تا رادەیەكی زۆر باش ئاشنامان دەكات بە مێژووی خۆمان و ئەو نەهامەتیانەی بەسەر گەلەكەماندا هاتووە، بوونی ژن لە نێو ئەم رۆمانەدا هاندەرێكی باشە كە ژن بیرەوەری خۆی بنووسێتەوە، هەرچەندە كەم نین ئەو ژنانەی كە خەریكی نووسینەوەی بیرەوەری خۆیانن، بەڵام هێشتا پێویستمان بە بیرەوەری زیاترە بۆئەوەی ژن پەلكێشی دونیای نووسینی رۆمان بكەین .
وەكو ژنێك لە كاتی خوێندنەوەی ئەم رۆمانە و چەندین بیرەوەری ژنانی تر هەستم بەوە كرد كە ژنەكان زیاتر راستگۆن لە نووسینەوەی بیرەوەرییەكانیاندا، هیوادارم ئەم رۆمانە بخوێنرێتەوە و لە دیدی جیاوازەوە قسە لەسەر رۆڵی ژن لە شۆڕشەكانی كورددا بكرێ
سەرچاوە : کوردستانی نوێ
