فیلمی كوردی " The Exam"، واتە تاقیكردنەوە یەكێك دەبێت لەو فیلمانەی لە ئاهەنگی دابەشكردنی خەڵاتەكانی ئۆسكاری 2023 لە ئەمەریكا و ئەڵمانیا نوێنەرایەتی عێراق دەكات، فیلمەكە لە دەرهێنانی شەوكەت ئەمین كوركییە، باسی كێشەی ژن لە رۆژهەڵاتی ناوەڕاست دەكات.
مەنسوور جیهانی، نووسەری سینەمایی لەوبارەوە دەڵێت، بڕیارە فیلمی "تاقیكردنەوە" لە دەرهێنانی شەوكەت ئەمین كوركی و بەرهەمهێنانی مەمەد ئاكتاش، لە 3ی دیسێمبەری 2023 لە لۆس ئەنجلۆس و لە 6ی دیسێمبەر لە نیویۆرك و لە 8ی دیسێمبەر لە بەرلین لە ئەڵمانیا پێشان بدرێت، فیلمەكە باسی كێشەكانی ژن لە رۆژهەڵاتی ناوەڕاست دەكات.
روونی كردەوە، ئەو فیلمە بە هاوبەشی لەلایەن هەرێمی كوردستانی عێراق و ئەڵمانیا و قەتەرەوە بەرهەم هاتووە، لە یەكەم پێشاندانی جیهانی لە بەشی كێبەركێی سەرەكی " Crystal Globe " لە كارەكانی 55مین فێستیڤاڵی " Karlovy Vary "ی سینەمایی نێودەوڵەتی، خەڵاتی " FIPRESCI "ی لەلایەن یەكێتی نێودەوڵەتی رەخنەگرانی سینەما بەدەست هێنا.
جیهانی ئاماژەی كرد، ژمارەیەك ئەكتەری ناودار و خاوەن ئەزموون لە هەرێمی كوردستان رۆڵی نواندن لەو فیلمە دەگێڕن، لەپاڵ ژمارەیەك ئەكتەری گەنج لەوانە، ئاڤان جەمال و ڤانیا سالار حوسێن حەسەن و شوان عەتووف و هۆشیار زیرۆ نێروەیی و نیگار عوسمان و كاوە قادر و عادل عەبدورەحمان.
سەرچاوە: wishe
