تەوار شێرکۆ عثمان
سیاسەت لە دنیای مرۆڤەکاندا ڕۆڵی گرنگی هەیە و زۆر جار ژیان و سیاسەت پێکەوە گرێ دراون، بە تایبەت ئەگەر ئەو سیاسەتکردنە لە خزمەت مرۆڤەکان و ژینگە وژیاندا بێت بە گشتیی ، بەڵام ئەم سیاسەتکردنە لەلای زۆرێک لە دەسەڵاتدارە خۆسەپێن ودیکتاتۆر و کورسی پەرستەکان گۆڕانکاریی بەسەردا دێت.
لای ئەوان و دامو دەزگاکانیان سیاسەت کردن یان نییە یان لە خزمەت دەسەڵاتەکەیاندایە. هەمیشە ئەو پرسیارە دەکرێت، ئایا وەکو کورد لە مێژوودا چەند سەرکردەی وامان هەبووە کە خەمی هەمیشەییان بەرژەوەندی گشتی گەلەکەیان بووبێت؟
یاخود هەوڵیان داوە دادپەروەرو بە ویژدان بن بۆ خزمەتکرنی نەتەوەکەیان ؟
یان ئەگەر کەسی سیاسیی وامان هەبووبێت ، ئەوا هەر زوو لەژیان بێ بەش کراون.
بەداخەوە زۆربەی سەرکردە و سیاسییەکانیی کورد لەبەردەم پارە و ئیمتیازاتی تر کەدەبنە مایەی خۆشگوزەرانی بەرژەوەندی خەڵک و تەنانەت خاکی خۆشیان لەبیرکردووە ،ئیتر ئەوان لە دۆڵێک و ئەو خەڵکە داماوەی کە دواشیان کەوتوون لە دۆڵێکی تر (بە داخەوە سیحری دەسەڵات و پارە و شئیمتیاز زۆر جار خێزانەکانیش لەبەریەک هەڵئەوەشێنێت).
ڕەنگە پلە بەندی بکرێت لە کەسەکاندا بەڵام ئێمەی کورد تا ئێستاکە کەسێکی شیاومان نەبووەلەمێژووی سیاسییدا، هۆکارەکەی ئەوەیە کە هەرکەسێک زیاد لە چەند ساڵێک لە پۆستێکدا مابێتەوە ئەوا زۆر بە دەگمەن هەڵکەوتووە کە .ئاشقی کورسی و پارە و ئیمتیازات نەبووبێت. کورد لە بنەڕەتدا لە هەرچوار پارچەکەو بەتایبەیش کوردی باشوور تا ئەمڕۆ کەسێکی شیاو وای تیا هەڵنەکەوتووە تینووی دەسەڵات نەبێت یان سیاسەتی نەکردبێت بۆ مەبەستی گەیشتن بە کێکی دەسەڵات.
حەپەلووشکردنی داهاتی گشتی و دزینی سامانی سروشتی بۆخۆیان وداردەستەکانیان.
وێرن فینک دەڵێت: (هەموان دەیانەوێت لەسەر مێزی دەسەڵات نان بخۆن، بەڵام هیچ کەس ئامادە نییە دوای نان خواردن مێزەکە پاک بکاتەوە).
ئەوە لای برادەرانی ئەو لا کە ئێستاش بە نەزمی شەڕی نەگریسی ناوخۆ پێیدەوترێت (زۆنی زەرد ) باس ناکەین، چونکە لەوێ لە سایەی توندوتیژیی و چاوسوورکردنەوەکان و سەرکوتکردن و کڕینی نەفس و کەرامەتی بەشێکی زۆری هاوڵاتیان جۆرە سیستەمێکی پاشایەتی و کۆیلایەتی بەرقەرارە.
پێویست ناکات ڕوون کردنەوەی زیاتر بدەین هەمووان بە ئەخلاقەو بڕوانینە وەزعەکە ئەزانین چی ئەگوزەرێ.
با باسی بەشە خێرنەدیووەکەی تر بکەین کە ئەویش تا ئێستا و بە هۆی بەردەوامی هەناسەکانی شەڕی ناوخۆ بە ( زۆنی سەوز ) ناسراوە، بە حسابی جاران حیزبێک بەڕێوەی دەبات کە بە ناو (سۆسیالدیموکرات)ناوبراوە!!؟
کە نە سۆسیالە و نە دیموکرات، چونکە بە ئاسانیی ئەمانیش کارێکیان کردووە مرۆڤ ڕقی لە هەموو سۆسیال دیموکراتێکی جیهانیش بێت.
سۆسیال دیموکرات و تا ئێستا بڕوای بە خێڵگەرایی و هۆز و تیرە و تایەفە هەیە ، فیستیڤاڵی خێڵ و عەشیرەتەکان باشترین نمونەن ، سۆسیال دیموکراتە و خەریکی پشی پشییە بۆ سەلەفیی و ناوەندە ڕۆشنگەریی و ڕۆشنبیرییەکان دادەخات و هاوکاریی داراییان دەبڕێت بۆ دڵئاسودەکردنی سەلەفییەکان.
سۆسیال دیموکراتە و دەسەڵاتی حیزب لە باوکەوە بۆ کوڕانی گوازراوەتە. ئەو مناڵانەی کاتێک کوڕ و کچی پێشمەرگەی ئاسایی لە ناو خاک و خۆڵی نیشتمان ژیانی مناڵییان لێ زەوتکرابوو وگەورە دەبوون و ئایندەیەکی ڕۆشنیان لێ دیارنەبوو یان برسیی بوون یاخود گوللە و ناپاڵمی بەعس جەستەی ئەنجن ئەنجن دەکردن کوا دیموکراتی و ئازادی بۆ ئەوان؟ بەڵام ئەو کوڕانەی ڕۆژێک لە ڕۆژان برسێتیان نەدی ئاوارەییان نەدی، ناخۆشییەکیان نەبینی ، لەوانەیە بڵێن گوناهبوون، دوور بوون لە نازی دایک و باوکیان، بەڵام ئەوان ژیانێکی خۆش ژیاون و ڕۆژێک لەدنیای مناڵی خۆیان دانەبڕاون هەرگیز بڕوا ناکەم هەستیان بە ترسی نەبوونی کردبێت، یان چاوەڕێ بن کەس وکار پێداویستی خوێندنگاو ژیانیان بۆ دابین بکەن ئەوا بەدڵنیای یەوە ئەبێ ئەمان مافەکانی ئەو چینەی باسم کرد دابین بکەن و خۆیان بە خاوەنداریان بزانن.
با زۆر نەچینە ناوەڕۆک، بەڵام پێم بڵێن ئەوانەی لەتەمەن لەمن گەورەترن پێشمەرگایەتی و شاختان بینیووە، ئایا بەرپرسەکانتان هەمان خواردنی ئێوەیان خواردووە؟یان هەموو پێشمەرگەکان بە یەک چاو سەیرکراون؟ یان چ شەوێک سەرۆکی حیزب و پلەبەرزەکان شەونخونیانکردووە و ڕێگایان بە ئێوە داوە بە ئیسراحەت بخەون و پشووبدەن؟؟
ئەی ئێستا چی؟ سەرۆکی حیزب، یان لێپرسراوە باڵاکان و کەسوکاری نزیک و دووریان تەنانەت لێپرسراوی پاسەوانەکانیان کامیان وەک خەڵکی ئاسایی و ئەوانە دەژین کە بە دڵسۆزیی لەگەڵیانن، کامیان ژیانیان کولەمەرگییە؟ کامیان لە ترسی قەرزاریی شەرم لە دوکانداری گەڕەک دەکات و هەر مانگەی بە درۆیەک ساحێب خانوو ئیزن دەدات چونکە پارەی کرێی خانووی پێ نییە ؟
ئێستا لە هەردوو دەڤەری ناوبراو تەنها ژیان بۆ ئەوانەیە کە نزیکن لە پایەکانی ئەو دەسەڵاتەی هەموو شتێک لە پارەدا دەبینێت و پارەش بەتەنها بۆ ژیانی شاهانە و پڕ خۆشگوزەرانی بۆ ماڵبات و نزیکەکانی خۆیان بەڕەوا دەبینن، بەڵام کە دێنە سەر شاشەکان کوردایەتی و نەتەوایەتی بە خەڵکی بەشمەینەت دەفرۆشنەوە و ئەسڵەن قەرزارباریشیان دەکەن.
ئەوان میللەتێکی باش یان کڵۆڵیان هەیە کە دەتوانن وەک دامەی شەتڕەنج لە بری سەرۆک و دەسەڵاتدارەکان لەسەر دەربڕنێک .
یان هەڵوێستێک بکەونە وێزەی یەکتر وشەڕی بە وەکالەت بکەن ، کە ئەمە مەترسییە گەورەکەیە ، ئەمە ئەو ڕۆژگار و ئەو کەسانەیە کە سەرکردەکورسی پەرست ودکتاتۆرەکان دەیانەوێت و زۆریش سوورن لەسەر بەردەوامبوونی، ئەوەشیی پشتیان دەگرێت ووڵاتە سەرمایەدارەکانن کە مەبەستیانە هەندێک ناوچە بەردەوام پشێو و داڕزیو بێت و سیستمی حوکمڕانیشیی وەک ئەوەی ئەوان ئەیانەوێت بەدەستیانەوە بێت و چۆنیان بوێت یاریی پێبکەن،ڕەنگە زۆر کەس زۆر شتی زیاتری لەم نووسینەی منی لە دڵا بێت ، بەڵام کێشەکە ئەوەیە یان ناوێرێ یان بێهیوا بووە. بەڵام دەبێت ئەو ترس و بێهیواییە بخرێتە لاوە.
وەک وتراوە ( مەرگ بەشێوازی لەدایک بوون ئازایەتی دەوێت ڕێمەدەن کەس ئازادیتان لێ زەوت بکات و لەبەرخۆوە ناڕەزایی دەرمەبڕن).
سەرچاوە : سپی مئدیا
